جاپان د خپل تاریخ تر ټولو ستر بودجه تصویب کړه

د جاپان حکومت د خپل مالي تاریخ یو مهم پړاو ته ورسېد، کله چې د دغه هېواد کابینې د مالي کال ۲۰۲۶ تر ټولو لوی ملي بودجه په رسمي ډول تصویب کړه. د جاپاني رسنیو د راپورونو له مخې، دا بودجه ۱۲۲٫۳ تریلیون ین ارزښت لري، چې له ۷۷۰ میلیاردو امریکایي ډالرو څخه زیاته ده او د جاپان په تاریخ کې تر ټولو لوړه بودجه بلل کېږي

د جاپان دولتي ټلویزیون «ان‌اچ‌کې» اپور ورکړی، چې دا د تېرو ۱۲ کلونو په موده کې د بودجې لومړنۍ پراخه او صعودي بیاکتنه ده، چې د لوړو بیو، اقتصادي بدلونونو او نړیوالو مالي فشارونو په غبرګون کې ترسره شوې ده. د لومړنیو ارزونو له مخې، حکومت غواړي د عمومي حساب بودجه همدغې کچې ته نږدې ثابته وساتي

د بودجې د پام وړ زیاتوالی

د نوې تصویب شوې بودجې اندازه د روان مالي کال له لومړنۍ بودجې سره په پرتله له ۷ تریلیون ینو (شاوخوا ۴۴ میلیاردو ډالرو) څخه زیاته ده. د روان کال بودجه نږدې ۱۱۵٫۱۹ تریلیون ین وه، خو د نوې پرېکړې له مخې جاپان یو نوی مالي ریکارډ ثبت کړ

اقتصادي ننګونې او حکومتي هدفونه

کارپوهان وایي، د بودجې دا بې‌ساری لوړوالی د لوړ انفلاسیون، د ژوند د لګښتونو زیاتوالي، د ټولنیزو خدمتونو پراختیا او اقتصادي ثبات د ساتلو په موخه تصویب شوی دی

د جاپان حکومت هڅه کوي د دې بودجې له لارې د خلکو پر ژوند اقتصادي فشارونه کم کړي او د هېواد اقتصاد له نړیوالو بدلونونو سره عیار وساتي

تاریخي پرېکړه

د جاپان د تاریخ تر ټولو لویه بودجه په داسې وخت کې تصویب شوې، چې نړیوال اقتصاد له بې‌ثباتۍ سره مخ دی. شنونکي باور لري، چې دا پرېکړه به نه یوازې د جاپان پر کورني اقتصاد اغېز ولري، بلکې د اسیا او نړۍ په اقتصادي معادلو کې به هم د پام وړ رول ولوبوي