د دارالامان د افشار معترضین لا هم بندیان دي؛ د قومي مشر نیول کېدل د اندېښنو نوې څپه راپورته کړې

د باوري سرچینو په وینا، چې له افغانستان انټرنشنل سره یې خبرې کړې دي، د کابل ښار د دارالامان د افشار سیمې هېڅ یو معترض، سره له دې چې نږدې دوه اوونۍ ترې تېرې شوې، تر اوسه نه دی خوشې شوی. دا په داسې حال کې ده چې د یادې سیمې اوسېدونکو د خپلو مدني غوښتنو د مطرح کولو په موخه سوله‌ییز لاریونونه کړي وو، خو د طالبانو له لوري ونیول شول

سرچینې زیاتوي، چې نه یوازې معترضین لا هم په نامعلوم برخلیک کې ساتل کېږي، بلکې د هغوی د خوشې کېدو لپاره د منځګړیتوب هڅې هم له سخت خنډ سره مخ شوې دي. د معلوماتو له مخې، د طالبانو د عدلیې وزیر د سید سکندر پروېزي په نوم یو پېژندل شوی قومي مشر هم نیولی دی؛ هغه څوک چې هڅه یې کوله د قومي اړیکو او سوله‌ییزو خبرو له لارې د معترضانو د ازادۍ لار هواره کړي

د افشار د سیمې د اوسېدونکو په خبره، د سید سکندر پروېزي نیول د خلکو ترمنځ وېره او اندېښنه نوره هم زیاته کړې ده. هغوی وایي، چې پر ځای د دې چې د ولس غږ واورېدل شي، هغه کسان هم نیول کېږي چې د شخړې د حل لپاره د خبرو اترو هڅه کوي

تر اوسه د طالبانو له لوري د یادو نیونو په اړه کوم رسمي وضاحت نه دی ورکړل شوی، او دا چوپتیا د خلکو شکونه لا پسې پیاوړي کړي دي. د بشري حقونو فعالان خبرداری ورکوي، چې د مدني اعتراضونو ځپل او د قومي مشرانو نیول کولای شي ټولنیز کړکېچونه ژور کړي او د ولس او واکمنانو ترمنځ واټن لا زیات کړي

په ورته وخت کې، د افشار د معترضانو کورنۍ له نړیوالو بنسټونو، د بشري حقونو له سازمانونو او د رسنیو له لارې غږ پورته کوي، څو د دوی د عزیزانو د خوشې کېدو لپاره جدي او بېړني ګامونه واخیستل شي. هغوی ټینګار کوي، چې سوله‌ییز اعتراض د خلکو بنسټیز حق دی او د زور له لارې د غږ چوپول به د ستونزو حل نه، بلکې لا زیاتې ستونزې وزېږوي