د تاپي ستره پروژه: په افغانستان کې ۹۷ کیلومتره مسیر پاک او د اقتصادي تحول نوې هیله

د تاپي ستره پروژه: په افغانستان کې ۹۷ کیلومتره مسیر پاک او د اقتصادي تحول نوې هیله

بریانیوز:(سه شنبه،۵ حوت ۱۴۰۴)

د تاپي پروژې ۹۷ کیلومتره مسیر په افغانستان کې پاک شوی

د د طالبانو اداره د کانونو او پټرولیم وزارت ویاند همایون افغان اعلان کړی چې د تاپي سترې انرژۍ پروژې ۹۷ کیلومتره مسیر په افغانستان کې پاک او چمتو شوی دی

نوموړي ویلي چې نوې نلکې د پروژې ساحې ته لېږدول شوې دي او ټاکل شوې په نږدې ورځو کې د نصب چارې په چټک ډول پيل شي. د هغه په وینا، اوس مهال هره ورځ شاوخوا ۵۰۰ متره نل لیکه غځول کېږي او تمه ده چې د دې پروژې ۱۵۳ کیلومتره برخه، چې د هرات ولایت له لارې تېرېږي، د ۲۰۲۶ کال تر پایه بشپړه شي

تاپي پروژه څه ده؟

تاپي پروژه د سیمې له مهمو اقتصادي او انرژۍ پروژو څخه شمېرل کېږي، چې موخه یې د ترکمنستان طبیعي ګاز د افغانستان له لارې پاکستان او هند ته لېږدول دي. دا پروژه نه یوازې د انرژۍ د انتقال ستره طرحه ده، بلکې د سیمه‌ییزې همکارۍ او اقتصادي نښلونې یو مهم سمبول هم ګڼل کېږي

د افغانستان لپاره اقتصادي اهمیت

کارپوهان باور لري چې تاپي کولی شي افغانستان ته د ټرانزیټ له لارې د پام وړ عواید برابر کړي، زرګونه کاري فرصتونه رامنځته کړي او د انرژۍ په برخه کې د هېواد بنسټیزې اړتیاوې پوره کولو کې مرسته وکړي. همداراز، دا پروژه به افغانستان د سیمې د انرژۍ په مهم دهلېز بدل کړي

خو د دې سترې پروژې له اهمیت سره سره، یو شمېر شنونکي ټینګار کوي چې اړینه ده د طالبانو اداره د عملي پرمختګ، د مسیر د امنیت ټینګښت، مالي شفافیت او د ملي ګټو د خوندي کولو په اړه لا روښانه او مفصل معلومات وړاندې کړي، څو ولس ډاډه شي چې دا تاریخي فرصت به په رښتینې توګه د هېواد د اقتصادي ودې سبب شي

امنیت او عملي پرمختګ

د تاپي پروژې بریالیتوب تر ډېره د امنیتي وضعیت او دوامداره تخنیکي کار پورې تړلی دی. چارواکي وایي چې د مسیر د امنیت لپاره لازم تدابیر نیول شوي، خو لا هم د سیمې د سیاسي او امنیتي شرایطو له امله د نړیوالو پانګه‌والو پام دې برخې ته اوښتی دی

په ټوله کې، که ټاکل شوې نېټې عملي شي او چارې له خنډ پرته پر مخ ولاړې شي، تاپي به د افغانستان لپاره د اقتصادي بدلون او سیمه‌ییز اتصال نوی باب پرانیزي