هند او اروپایي اتحادیه د آزادې سوداګرۍ تاریخي تړون لاسلیک کړ؛ سیمه‌ ییز اقتصاد ته د ودې نوې فرصتونه پرانیستل شول

هند او اروپایي اتحادیه د آزادې سوداګرۍ تاریخي تړون لاسلیک کړ؛ سیمه‌ ییز اقتصاد ته د ودې نوې فرصتونه پرانیستل شول

بریانیوز( پنجشنبه، ٧ حوت ١٤٠٤) 

  په ننۍ نړۍ کې چې اقتصادونه یو له بل سره بې‌ جلا تړاو لري، د هېوادونو ترمنځ د آزادې سوداګرۍ تړونونه د اقتصادي همکارۍ پراخولو او د مالونو او خدماتو د تبادلې د زیاتوالي لپاره اساسي او اغېزمنه وسیله ګڼل کېږي. دا ډول تړونونه نه یوازې د سوداګرۍ خنډونه له منځه وړي یا کموي، بلکې د تولیدي وړتیا لوړوالی، د رقابت ځواک زیاتوي او د پایښت لرونکي اقتصادي پرمختګ او د خلکو د ژوند کچې د ښه والي زمینه برابروي

په تېرو لسو کلونو کې، د نړیوالې سوداګرۍ په ډګر کې ستر بدلونونه لیدل شوي، چې له دې جملې څخه یو د پام وړ تحول د هند او اروپایي اتحادیې ترمنځ د آزادې سوداګرۍ تړون لاسلیک دی. د دې تړون اهمیت د دواړو لورو د ستر اقتصاد، پراخ نفوس او په نړیوال ناخالص تولید کې د دوی د پام وړ ونډې له امله ځانګړی ګڼل کېږي

د تړون بنسټیز اهداف د سوداګرۍ د پروسو اسانه کول، د ګمرکي تعرفو کمول، د پانګونې ملاتړ، او د اقتصادي او ټکنالوژۍ د همکارۍ پراخول دي. کارپوهان وایي چې دا تړون به په ځانګړي ډول د منځنۍ آسیا هېوادونو او افغانستان لپاره بې‌ساري اقتصادي فرصتونه رامنځته کړي، ځکه دغه هېوادونه د هند او اروپا ترمنځ د اصلي ترانزیتي لارو په توګه عمل کوي

څېړنې ښيي چې که په دې سیمه کې د ترانسپورتي زیربناوو وضعیت ښه شي او په افغانستان کې سیاسي ثبات راشي، نو د هند او منځنۍ آسیا ترمنځ سوداګري به په چټکۍ وده وکړي. د ترانسپورتي او ترانزیتي خدماتو عواید به ډېر شي، سیمه‌ییز اقتصاد به ځواکمن شي، او د خلکو لپاره د نوو دندو رامنځته کېدو فرصتونه به پراخ شي

د هند او اروپایي اتحادیې د آزادې سوداګرۍ تړون. د ۲۰۲۶ کال د جنورۍ په ۲۷مه د هند او اروپایي اتحادیې د سوداګریزو کنفرانس په ترڅ کې د هند د لومړي وزیر او د اروپایي اتحادیې د کمیسیون د رئیس لخوا لاسلیک شو. د هند لومړي وزیر دا تړون د تاریخي اهمیت له مخې تر ټولو ستر وباله، او د اروپایي اتحادیې د کمیسیون رئیس یې د ټولو تړونونو مور وبلله

دا تړون د هند پر روښانه اقتصادي ځواک د اروپایي اتحادیې پر لوی بازارونو وصلوي چې ارزښت یې له ۲۳ تریلیونو یورو څخه زیات دی. دغه بازار شاوخوا دوه میلیارده نفوس لري او د نړۍ د ناخالص داخلي تولید نږدې ۲۵ سلنه برخه پکې شامل ده. په اوس وخت کې د هند او اروپایي اتحادیې ترمنځ دوه اړخیزه سوداګري شاوخوا ۱۳۰ میلیارده ډالره ده، چې د موجوده اقتصادي ظرفیت په پرتله ټیټه ده

کارپوهان باور لري چې د دې تړون عملي کېدل به د سوداګرۍ او پانګونې نوې دروازې پرانیزي، د سیمه‌ییزو هېوادونو اقتصادي ودې ته وده ورکړي، او د خلکو لپاره د نوو کارموندنې فرصتونه رامنځته کړي. د اقتصادي شنونکو په وینا، دغه تړون د هند او اروپا د همکارۍ تاریخي او ستره نوې لاره ده چې سیمه‌ ییز او نړیوال اقتصاد یې اغېزمن کولای شي