امانويل مکرون: فرانسه به خپله اټومي وسلو زېرمه نوره هم زياته کړي

امانويل مکرون: فرانسه به خپله اټومي وسلو زېرمه نوره هم زياته کړي

بریانیوز:(سه شنبه،۱۲حوت۱۴۰۴)

پاریس –  ولسمشر امانويل مکرون اعلان کړی چې هېواد به یې د لومړي ځل لپاره خپله اټومي وسلو زېرمه پراخه کړي. نوموړي ويلي، دا پرېکړه د ملي خونديتوب، دفاعي خپلواکۍ او د اروپايي وچې د ثبات د ساتنې لپاره شوې ده

مکرون ټينګار وکړ چې اوسنی نړيوال حالت له ګڼو امنيتي ننګونو سره مخ دی. د ده په وينا، فرانسه اړ ده چې خپل دفاعي ځواک پياوړی کړي، څو د هر ډول احتمالي ګواښ پر وړاندې چمتووالی ولري. هغه وويل چې اټومي وسلې د مخنيوي يوه اغېزمنه وسيله ده او د هېواد د ساتنې په برخه کې مهم رول لري

فرانسه چې د ملګري ملتونه د امنيت شورا دايمي غړې ده او د ناټو په پوځي تړون کې هم ګډون لري، له پخوا راهيسې خپل اټومي ځواک د خپلواک مخنيوي پر بنسټ ساتلی دی. دا مانا لري چې هېواد د خپلې خاورې او ولس د دفاع په اړه خپله پرېکړه پخپله کوي

د فرانسې اټومي ځواک دوه اساسي برخې لري:

يوه برخه د سمندري ځواکونو له لارې ده، چې اټومي توغندي لېږدونکي اوبتلونه لري؛ بله برخه د هوايي ځواکونو له لارې ده، چې اټومي سرګولۍ وړونکې الوتکې کاروي. د ولسمشر په وينا، زياتوالی به د همدې جوړښت په چوکاټ کې ترسره شي

ځينې سياسي شنونکي باور لري چې دا پرېکړه به په اروپا کې د امنيتي بحثونو نوې څپه راولاړه کړي. يو شمېر هېوادونه دا ګام د دفاعي پياوړتيا په توګه ستايي، خو نور بيا اندېښنه لري چې ښايي د وسلو سيالي نوره هم تېزه کړي

امانويل مکرون ويلي، فرانسه به د نړيوالو اصولو درناوی کوي او دا ګام يوازې د دفاع لپاره دی، نه د بريد لپاره. د هغه په ټکو، “قوي مخنيوی د جګړې د نه رامنځته کېدو تر ټولو غوره لاره ده.”

د کارپوهانو په اند، دا پرېکړه ښيي چې اټومي ځواک لا هم د نړيوال سياست په ډګر کې د ځواک، اغېز او توازن مهمه برخه ده، او فرانسه غواړي په اروپا کې خپل مخکښ دريځ نور هم پياوړی کړي