هسپانیا امریکا ته خبرداری: زموږ په خاوره کې د ایران پر ضد بریدونو اجازه نشته

هسپانیا امریکا ته خبرداری: زموږ په خاوره کې د ایران پر ضد بریدونو اجازه نشته

بریانیوز:(سه شنبه،۱۲حوت۱۴۰۴)

مادرید – د هسپانیا حکومت د امریکا متحدو ایالتونو ته په ډاګه ویلي، چې په خپله خاوره کې د ایران پر ضد کوم پوځي عملیات یا بریدونه اجازه نه ورکوي. دا څرګندونې د هغو راپورونو په پس منظر کې مخې ته راغلي، چې ایران په وروستیو ورځو کې د منځني ختیځ د کړکېچونو په چوکاټ کې دوه توغندي د قبرس پر لور هم ویشتلي وو

د هسپانیا چارواکو ټینګار کړی، چې د هیواد خاوره د نړیوالو قوانینو له مخې خوندي ده او د بهرنیو ځواکونو لخوا د پوځي عملیاتو ترسره کول په هسپانیا کې د ملي حاکمیت ښکاره سرغړونه ګڼل کېږي

تر دې وړاندې د بریټانیا ځواکونو ویلي، چې د ایران له لوري پر قبرس د ویشتل شویو توغندیو ځینې برخې يې خنثی کړي، چې له امله یې د سیمه‌ییزو ملکیانو او پوځي زیرمو د زیان مخنیوی شوی دی

سیاسي شنونکي اندېښنه ښيي، چې د منځني ختیځ د وروستیو کړکېچونو پراخېدل نه یوازې د سیمې هېوادونه بلکې د اروپایي متحدینو او نړیوالو ځواکونو امنیتي وضعیت هم له خطر سره مخ کوي. د هسپانیا او نورو اروپایي هېوادونو دا څرګندونې ښيي، چې د نړیوالو قوانینو او ملي حاکمیت درناوی د سیمې د کړکېچونو د محدودولو لپاره بنسټیزه اړتیا ده

په عین وخت کې، د ایران وروستي توغندي ښيي چې د سیمې کړکېچونه لا هم ادامه لري او د نړیوالو ځواکونو او سیمې هېوادونو ترمنځ حساسیتونه نور هم لوړ شوي دي. شنونکي ټینګار کوي، چې هر ډول پوځي اقدام باید د ډیپلوماټیکو لارو چارو او نړیوالو اصولو په چوکاټ کې ترسره شي، څو د یوې پراخې جګړې د رامنځته کېدو مخه ونیول شي