د افغانستان په اړه د سیمه‌ ییزو خبرو نوی پړاو: تاشکند او اوسلو د ګډ ډیالوګ پر دوام ټینګار وکړ

اشتراک گذاری:

بریانیوز:(پنجشنبه،۲۷ حمل۱۴۰۵)

د افغانستان لپاره د اوزبېکستان د ولسمشر ځانګړي استازي عصمت‌الله ارګاشېف پرون (چهارشنبه) د ناروې له نوې ټاکل شوې سفیرې هلن سند اندرسن سره کتلي دي، چې د دواړو هېوادونو ترمنځ د افغانستان د وضعیت په اړه د نظرونو د تبادلې مهم فرصت بلل کېږي

د اوزبېکستان د بهرنیو چارو وزارت د معلوماتو له مخې، په دې لیدنه کې د افغانستان په تړاو د دوه اړخیزو همکاریو پر اوسني وضعیت، سیمه‌ییزو بدلونونو او د ګډو هڅو پر اړتیا هر اړخیز بحث شوی دی. دواړو لورو ټینګار کړی چې د افغانستان په اړه منظم او دوامداره ډیالوګ باید وساتل شي، څو د سیمه‌ییز ثبات لپاره ګډ دریځونه پیاوړي شي

په کتنه کې د ناروې سفیرې هلن سند اندرسن د افغانستان په اړه د یوه ګډ سیمه‌ییز نظر د رامنځته کولو لپاره د اوزبېکستان هڅې ستایلي او دا یې د ثبات او همغږۍ په لور یو مثبت ګام بللی دی

کارپوهان وايي، د منځنۍ اسیا هېوادونو او اروپايي هېوادونو ترمنځ دا ډول خبرې اترې کولای شي د افغانستان د روان وضعیت په اړه د نړیوالو هڅو همغږي نوره هم پیاوړې کړي او د اوږدمهاله حل لپاره زمینه برابره کړي

تر اوسه دواړو هېوادونو د دغو خبرو د عملي پایلو په اړه نور جزییات نه دي ورکړي، خو ټینګار شوی چې د افغانستان موضوع به د راتلونکو غونډو په اجنډا کې هم مهم ځای ولري