اوچا: په افغانستان کې د واکسین پراخ کمپاینونه د ماشومانو ژوند ژغوري

اشتراک گذاری:

بریانیوز:( شنبه،۵ ثور۱۴۰۵)

کابل – د ملګرو ملتونو د بشري مرستو د همغږۍ ادارې (اوچا) سرپرست، تاج‌الدین اویوالي، ویلي چې په ۲۰۲۵ کال کې په افغانستان کې د ماشومانو د ساتنې لپاره د واکسین پراخ کمپاینونه په بریالیتوب سره ترسره شوي دي

نوموړي پر خپل اېکس (پخواني ټویټر) لیکلي چې د همدې کال په اوږدو کې ۱۲ میلیونه ماشومان د پولیو یا ګوزڼ پر وړاندې واکسین شوي، چې دا د ټول هدف ۹۸ سلنې ته رسېدنه ښيي. دا په داسې حال کې ده چې افغانستان لا هم د هغو محدودو هېوادونو له ډلې څخه دی چې د پولیو ویروس پکې بشپړ له منځه نه دی تللی

د اویوالي په وینا، د پولیو تر څنګ، ۱۶.۶ میلیونه ماشومانو ته د شري (سرخکان) واکسین هم ورکړل شوی، او همدارنګه ۱.۶ میلیونه ماشومانو د پینتا-۳ واکسین ترلاسه کړی، چې د څو خطرناکو ناروغیو پر وړاندې د معافیت مهمه برخه بلل کېږي

هغه ټینګار کړی چې واکسین یوازې د ناروغیو مخنیوی نه کوي، بلکې د ماشومانو ژوند ژغوري او د سالمې راتلونکې بنسټ ږدي. د ده په خبره، دا لاسته راوړنې د نړیوالو او کورنیو شریکانو د ژمنتیا، همغږۍ او نه ستړې کېدونکو هڅو څرګندونه کوي

کارپوهان وایي، که څه هم دا شمېرې د پام وړ پرمختګ ښيي، خو لا هم اړتیا ده چې د واکسین پوښښ لا پراخ شي، په ځانګړي ډول په هغو سیمو کې چې لاسرسی محدود دی. دوی ټینګار کوي چې دوامداره ملاتړ، عامه پوهاوی او د ټولنې همکاري د دې پروګرامونو د بریا لپاره حیاتي ارزښت لري

د روغتیايي بنسټونو په باور، د واکسین کمپاینونو دوام به افغانستان له خطرناکو ساري ناروغیو څخه خوندي کړي او د ماشومانو د مړینې کچه به په څرګند ډول راټیټه کړي