د وحدت تر شعار لاندې؛ د اطاعت ټینګار او د انتقاد د غږونو محدودول

د طالبانو مشر ملا هبت‌الله اخوندزاده د لوی اختر د لمانځه پر مهال په خپلې وینا کې پر وحدت، اطاعت او د اختلافاتو پر مخنیوي پراخ ټینګار وکړ، خو منتقدین وایي چې د وحدت شعار هغه وخت عملي بڼه خپلولای شي چې له خلکو سره د نظر څرګندولو، تعلیم، کار او سیاسي ګډون حقونه هم خوندي وي.

بریانیوز( چهارشنبه، ٦ جوزا ١٤٠٥)

د طالبانو مشر ملا هبت‌الله اخوندزاده د لوی اختر د لمانځه پر مهال په خپله وینا کې د اسلامي ټولنې د وحدت، د امیر د اطاعت او د داخلي اختلافاتو د کمولو پر اړتیا ټینګار وکړ. هغه۸۱ ځله پر وحدت، ۳۵ ځله پر اختلاف او ۱۲ ځله پر اطاعت خبرې وکړې.

هبت‌الله په خپله وینا کې د «وحدت» مفهوم ۸۱ ځله یاد کړ، د «اختلاف» موضوع ته یې ۳۵ ځله اشاره وکړه او د «اطاعت» کلمه یې ۱۲ ځله وکاروله، چې دا موضوعات د هغه د خطبې اصلي محور جوړوي.

هغه په خپلو خبرو کې وویل چې د مسلمانانو لپاره یووالی د دیني عملونو بنسټ دی او د اختلاف شته والی د عباداتو د بشپړولو مخه نیسي. د هغه په وینا، جهاد هم د مسلمانانو د یووالي د ټینګښت لپاره فرض عمل دی.

ملا هبت‌الله همدارنګه د اسلامي تاریخ په حواله وویل چې د پیغمبر په وخت کې خلکو ته ویل کېدل چې د اختر لمانځه ته د ګډون لپاره ووځي څو د مسلمانانو صفونه ښکاره شي او وروسته د اسلامي ځواک د پیاوړتیا په پایله کې یوازې نارینه دې لمانځه ته بلل کېدل.

هغه ټینګار وکړ چې د مسلمانانو د لیکو پراخول او یو موټی کول عبادت دی او داخلي اختلافات د اسلامي ټولنې د کمزورتیا سبب ګرځي. د هغه په وینا، مسلمانان باید خپل اختلافات د محبت او بښنې له لارې حل کړي.

د طالبانو مشر زیاته کړه چې د مسلمانانو لپاره د یو امیر درلودل ضروري دي او د همدې لپاره د منظم نظام جوړول اړتیا ده، چې خلک د هغه اطاعت وکړي. هغه د طالبانو اداره د نړۍ تر ټولو غوره اسلامي اداره وبلله.

هغه همدارنګه وویل، هغه کړنې چې د مسلمانانو ترمنځ د تفرقې سبب کېږي باید له منځه یووړل شي او د شخصي انتقام اخیستلو پر ځای بښنه او عفو غوره شي.

ملا هبت‌الله د خپلو خبرو په یوه برخه کې دا هم وویل چې مسلمانان باید د داسې حالت مخه ونیسي چې د اختلاف له امله د نورو تر واک لاندې راشي او ټینګار یې وکړ چې د اسلام هدف د انسانانو له بندګۍ څخه د بشر ازادول او د الله د عبادت لپاره د هغوی یو ځای کول دي.