له اختر وروسته د افغان کډوالو د ستنولو لړۍ بیا پیل شوه؛ د تورخم تړل کېدو ستونزې لا پسې زیاتې کړې

له اختر وروسته د افغان کډوالو د ستنولو لړۍ بیا پیل شوه؛ د تورخم تړل کېدو ستونزې لا پسې زیاتې کړې

بریانیوز( سه شنبه، ۱۲ جوزا ١٤٠٥)

  د راپورونو له مخې،  د اختر د رخصتیو له پای ته رسېدو وروسته د خیبر له سیمې څخه افغانستان ته د افغان کډوالو د ستنولو لړۍ یو ځل بیا پیل شوې ده

 دا بهیر په داسې مهال دوام مومي چې د تورخم مهمه پوله لا هم تړلې پاتې ده او د پولې دواړو غاړو ته یې د خلکو، سوداګرو او لېږدونکو موټرچلوونکو لپاره پراخې ستونزې رامنځته کړې دي

د تورخم د لارې بندېدو د دواړو خواوو د اوسېدونکو ورځنی تګ راتګ له خنډ سره مخ کړی او زرګونه هغه کسان یې اغېزمن کړي چې د سوداګرۍ، درملنې، زده کړو او کورنیو اړیکو لپاره پر دې لارې تکیه لري

همدارنګه راپورونه وایي چې ګڼ شمېر سوداګریز توکي د پولې دواړو غاړو ته بند پاتې دي، چې له امله یې سوداګرو ته مالي زیانونه اوښتي او د توکو د لېږد بهیر له ځنډ سره مخ شوی دی

بل لور ته یو شمېر پاکستاني وګړي چې په افغانستان کې پاتې دي، د تورخم د تړل کېدو له امله خپل هېواد ته د بېرته ستنېدو له ستونزو سره مخامخ شوي دي

شنونکي باور لري چې د تورخم پرانیستل نه یوازې د خلکو د تګ راتګ او سوداګرۍ لپاره مهم دي، بلکې د دواړو ګاونډیو هېوادونو ترمنځ د اقتصادي اړیکو او ولسي اړیکو په پیاوړتیا کې هم بنسټیز رول لري

د سیمې اوسېدونکي او سوداګر له دواړو لورو غواړي چې د شته ستونزو د حل لپاره ژر تر ژره عملي ګامونه پورته کړي، څو د خلکو ورځني ژوند او سوداګریز فعالیتونه بېرته عادي حالت ته راوګرځي