پولیس تاجیکستان یک افغان را به اتهام قتل پدرش بازداشت کرد

اشتراک گذاری:

وزارت داخله تاجیکستان روز چهارشنبه اعلام کرد که یک شهروند افغانستان در شهر وحدت این کشور به اتهام قتل بازداشت شده است. به گفته این وزارت، او متهم است که پدر خود را به قتل رسانده است.

بریانیوز - چهارشنبه، ١٣ جوزا ١٤٠٥

بر اساس اعلامیه وزارت داخله تاجیکستان، این رویداد حدود ساعت ۱۲:۰۰ ظهر در نزدیکی یک دکان میوه‌فروشی در خیابان سامانیان شهر وحدت رخ داده است.

پولیس گفته است میان متهم و پدرش که صاحب‌داد دولت‌زاده نام دارد، درگیری لفظی و سپس فیزیکی رخ داده است.

در گزارش پولیس آمده است که در جریان این درگیری، مظنون با چاقو دو ضربه به ناحیه سینه و پشت پدرش وارد کرده است.

قربانی در نتیجه جراحات شدید در محل رویداد جان باخته است.

وزارت داخله تاجیکستان افزوده است که نیروهای پولیس پس از انجام اقدامات فوری، مظنون را در کوتاه‌ترین زمان بازداشت کرده‌اند.

این وزارت گفته است تحقیقات در مورد این پرونده ادامه دارد.