روبیو: د اوسني اجرائیوي فرمان له مخې افغان کډوال امریکا ته د ننوتلو اجازه نه لري

اشتراک گذاری:

بریانیوز(پنجشنبه، ۱۴ جوزا ١٤٠٥)

د امریکا د بهرنیو چارو وزیر ویلي چې د امریکا د ملي ګارد پر ځواکونو له وروستي برید وروسته، د نافذ اجرائیوي فرمان له مخې اوس مهال هېڅ افغان کډوال متحده ایالاتو ته د ننوتلو اجازه نه لري

روبیو ویلي چې د امریکا حکومت د امنیتي اندېښنو له امله د کډوالو د منلو په تګلاره کې سخت شرایط پلي کړي او د اجرائیوي فرمان تر نافذ پاتې کېدو پورې به د افغان کډوالو د داخلېدو بهیر ځنډېدلی وي

د هغه په وینا، د امریکا حکومت د هېواد د ملي امنیت ساتنه خپل لومړیتوب ګڼي او د کډوالو اړوند پرېکړې د امنیتي ارزونو او قانوني چوکاټونو له مخې ترسره کېږي

نوموړي د امریکا د ملي ګارد پر ځواکونو وروستي برید ته په اشارې ویلي چې دا ډول پېښې د امنیتي تدابیرو د لا پیاوړتیا اړتیا څرګندوي او حکومت به د احتمالي ګواښونو د مخنیوي لپاره خپلې پالیسۍ له نږدې وڅاري

د روبیو څرګندونې په داسې وخت کې مطرح کېږي چې زرګونه افغانان لا هم د کډوالۍ، مېشتېدو او ویزو اړوند پروګرامونو د برخلیک په تمه دي او د امریکا د کډوالۍ تګلارو په اړه بحثونه دوام لري

شنونکي باور لري چې د کډوالو په اړه د امریکا هره نوې پرېکړه کولای شي د هغو افغانانو پر راتلونکي مستقیم اغېز ولري چې د خوندي مېشتېدو په هیله د امریکا د منلو پروګرامونو ته سترګې په لار دي