مقاله

د منځني ختیځ جګړې میلیونونه کسان د لوږې له ګواښ سره مخ کړي

اشتراک گذاری:

بریانیوز- یکشنبه، ١۷ جوزا ١٤٠٥

ملګرو ملتونو د خوړو نړیوال پروګرام خبرداری ورکړی چې په منځني ختیځ کې روانې جګړې او ترینګلتیاوې میلیونونه کسان د لوږې او خوراکي ناامنۍ پر لور ورنږدې کړي دي

دغه بنسټ ویلي چې د سون توکو د بیو لوړېدل، د لېږد رالېږد د لګښتونو زیاتوالی او د سوداګریزو لارو ګډوډي د خوراکي توکو بیې لوړې کړې دي، چې له امله یې د زیانمنو ټولنو پر ژوند فشارونه زیات شوي دي

د خوړو نړیوال پروګرام په وینا، د مرستندویه ادارو لپاره د مالي سرچینو کمښت هم د دې لامل شوی چې په بېلابېلو هېوادونو کې د بشري مرستو پروګرامونه محدود او یا کم شي، په داسې حال کې چې د مرستو اړتیا ورځ تر بلې لوړېږي

د ادارې مسئولینو ټینګار کړی چې که د تمویل ستونزه حل نه شي، میلیونونه اړمن کسان به له حیاتي خوراکي مرستو بې‌برخې شي او بشري وضعیت به لا پسې خراب شي

شنونکي باور لري چې د جګړو اقتصادي اغېزې یوازې د جګړې سیمو پورې محدودې نه دي، بلکې د انرژۍ، سوداګرۍ او خوراکي توکو نړیوال بازارونه هم اغېزمنوي، چې پایله یې د بېوزلو او زیانمنو هېوادونو لپاره د ژوند د لګښتونو لوړېدل دي

دا خبرداری په داسې وخت کې ورکول کېږي چې په منځني ختیځ کې امنیتي ترینګلتیاوې دوام لري او نړیوال بشري بنسټونه د مرستو د بودجې د کمښت له امله د خپلو فعالیتونو د محدودېدو له خطر سره مخ دي