د کندز یو اوسېدونکی: د طالبانو په محکمو کې مې د عدالت لپاره هڅې بې پایلې پاتې شوې

اشتراک گذاری:

د کندز ولایت یو اوسېدونکی وایي چې د طالبانو په محکمو کې یې د عدالت ترلاسه کولو لپاره له یو کال او درې میاشتو راهیسې هڅې کړې، خو تر اوسه یې کومه پایله نه ده لیدلې.

بریانیوز - یکشنبه، ١٧ جوز ١٤٠٥

احسان‌الله فاروقي بریانیوز ته په یوه پیغام کې ویلي، تېر کال د طالبانو د امام صاحب ولسوالۍ د ښاروال موټر ورسره ټکر کړی و چې له امله یې سخت ټپي شوی دی. د هغه په وینا، لا هم تر درملنې لاندې دی او روغتیايي ستونزې یې دوام لري.

فاروقي زیاتوي چې د پېښې له رامنځته کېدو وروسته یې څو ځله د طالبانو نظامي او ملکي محکمو ته شکایت کړی، خو قضیه یې نه ده څېړل شوې او د رسېدګۍ بهیر یې درېدلی دی.

هغه ادعا کوي چې ځینو عدلي او قضایي مسؤلینو ورته ویلي چې د ښاروال پر وړاندې د اقدام توان نه لري. د نوموړي په خبره، د درملنې لګښتونه یې سلګونو زرو افغانیو ته رسېدلي، خو تر اوسه یې هېڅ ډول مالي مرسته یا تاوان نه دی ترلاسه کړی.

فاروقي همداراز وایي چې د امام صاحب ولسوالۍ ښاروال، قاري نبي، نه یوازې د هغه د روغتیا پوښتنه نه ده کړې، بلکې د تاوان د جبران لپاره یې هم کوم عملي ګام نه دی پورته کړی. هغه پوښتنه کوي چې ایا د طالبانو چارواکي له قانون څخه پورته دي که نه.