مقاله

څېړنیز راپور: زرګونو هندیانو د امریکایي کاري ویزو لپاره جعلي تحصیلي اسناد کارولي

اشتراک گذاری:

بریانیوز- دوشنبه، ١۸ جوزا ١٤٠٥

یو تازه څېړنیز راپور ادعا کوي چې شاوخوا سل زره هندي وګړو د امریکا دکاري ویزې پروګرام لپاره جعلي پوهنتوني اسناد کارولي دي

د راپور له مخې، په هند کې یوازې یوه پوهنتون د شاوخوا ۳۶ زره کسانو لپاره جعلي تحصیلي سندونه صادر او پلورلي دي. ویل کېږي چې دغو اسنادو ته د لوړو زده‌کړو د رسمي اسنادو بڼه ورکړل شوې وه

راپور زیاتوي چې هر جعلي سند په نږدې ۱۴۰۰ امریکایي ډالرو پلورل شوی او ګڼو کسانو له همدې لارې د امریکا د کاري ویزو شرایط پوره کړي دي

د راپور له ادعا سره سم، یو شمېر دغو کسانو د طب، انجینرۍ، نرسنګ او نورو مسلکي برخو کې دندې ترلاسه کړې، حال دا چې د اړوندو مسلکونو لپاره یې لازم علمي او تخنیکي مهارتونه نه لرل

شنونکي وایي، که د راپور ادعاوې کره ثابتې شي، دا به د کډوالۍ، لوړو زده‌کړو او مسلکي تصدیقونو په برخو کې د څار او ارزونې د بهیر په اړه جدي پوښتنې راولاړې کړي

تر اوسه د امریکا اړوندو ادارو او همدارنګه د هند چارواکو د دغو ادعاوو په اړه رسمي او هر اړخیز غبرګون نه دی خپور کړی، او د راپور د موندنو د کره‌والي په اړه لا نورې څېړنې روانې دي

دغه راپور په داسې وخت کې خپرېږي چې د نړۍ په بېلابېلو هېوادونو کې د تحصیلي اسنادو د اعتبار، مسلکي وړتیاوو او د کاري ویزو د ارزونې بهیر ته ځانګړې پاملرنه کېږي