سیاست

ملګري ملتونه: د پاکستان په هوايي بریدونو کې ۱۳ ملکي وګړي وژل شوي

اشتراک گذاری:

بریانیوز- پنجشنبه، ۲۱ جوزا١٤٠۵

د ملګرو ملتونو د سرمنشي مرستیال ویاند فرحان حق ویلي چې د پاکستان د پوځ له لوري د کونړ، خوست او پکتیکا ولایتونو پر ځینو سیمو د ترسره شویو هوايي بریدونو له امله ۱۳ ملکي وګړي وژل شوي او ۱۴ نور ټپیان دي

نوموړي په یوه خبري غونډه کې ویلي چې د راپورونو له مخې، په دغو بریدونو کې د ملکي وګړو کورونه په نښه شوي او د ښځو او ماشومانو په ګډون ملکي خلکو ته مرګ‌ژوبله اوښتې ده

فرحان حق د پېښې په اړه اندېښنه څرګنده کړې او له دواړو لورو یې غوښتي چې د بشري حقونو اصولو او نړیوالو قوانینو ته ژمن پاتې شي هغه ټینګار کړی چې ملکي وګړي او ملکي تاسیسات باید د هر ډول پوځي عملیاتو له زیانونو خوندي وساتل شي او د جګړو پر مهال د نړیوال بشردوستانه قانون درناوی وشي

د ملګرو ملتونو دغه چارواکي همداراز له ښکېلو لورو غوښتي چې د تاوتریخوالي د زیاتېدو مخه ونیسي او خپلې ستونزې د خبرو اترو او سوله‌ییزو لارو له لارې حل کړي

دا څرګندونې په داسې وخت کې مطرح کېږي چې د افغانستان او پاکستان ترمنځ د وروستیو سرحدي پېښو او هوايي بریدونو په تړاو سیمه‌ییزې او نړیوالې اندېښنې زیاتې شوې دي