اقتصاد

د جلال‌اباد ریکشه‌چلوونکي: نوې مالیې او محدودیتونه مو له سختو اقتصادي ستونزو سره مخ کړي

اشتراک گذاری:

بریانیوز - جمعه ٢۶ سرطان ١٤٠٥

جلال‌اباد – د جلال‌اباد ښار یو شمېر ریکشه‌چلوونکي شکایت کوي چې پر ورځني عاید سربېره ترې د مالیې او د تګ راتګ د فیسونو اخیستل پیل شوي، چې د دوی اقتصادي ستونزې یې نورې هم زیاتې کړې دي

د دوی په وینا، ډېری ریکشې د ورځې په شاوخوا ۲۵۰ افغانیو کرایه چلوي، خو اوس ترې هره ورځ مالیه هم اخیستل کېږي. ریکشه‌چلوونکي وایي، ښار ته د ننوتلو اجازه نه لري او د ښار له دباندې څلور بېلابېل مسیرونه خصوصي شرکتونو ته سپارل شوي دي

د هغوی په خبره، د هر مسیر لپاره باید د ۳۰ افغانیو په بدل کې جلا پارچه واخلي، او د یوه مسیر پارچه په بل مسیر کې د اعتبار وړ نه ده. دوی زیاتوي، که یو ریکشه‌چلوونکی په یوه ورځ کې په ټولو څلورو مسیرونو کې کار وکړي، نو یوازې د پارچو لپاره باید ۱۲۰ افغانۍ ورکړي

ریکشه‌چلوونکي له اړوندو چارواکو غواړي چې د دغو مالیو او محدودیتونو په اړه بیاکتنه وکړي، ځکه د دوی په وینا، اوسنی وضعیت د دوی پر عاید او د کورنیو پر اقتصادي ژوند ناوړه اغېز کړی دی