اوچا: افغانستان لا هم د نړۍ له سترو بشري ناورینونو سره مخ دی

اشتراک گذاری:

بریانیوز/چهارشنبه ( ۱۴ / اسد /۱۴۰۵هـ.ش)

کابل – د ملګرو ملتونو د بشري مرستو د همغږۍ دفتر (اوچا) وایي، افغانستان لا هم د نړۍ له سترو بشري بحرانونو څخه یو تجربه کوي او په میلیونونو خلک بېړنیو مرستو ته اړتیا لري

د اوچا ویاندې اولګا چروکو په افغانستان کې یوې خبري غونډې ته ویلي، مرستندویه بنسټونه بشري مرستې یوازې د خلکو د اړتیاوو پر بنسټ وېشي او په دې بهیر کې سیاسي ملاحظات هېڅ رول نه لري

هغې خبرداری ورکړی چې د بودجې کمښت د بشري مرستو د رسولو وړتیا له جدي ننګونو سره مخ کړې ده او د خلکو د مخ پر زیاتېدونکو اړتیاوو د پوره کولو لپاره لا ډېرو مالي سرچینو ته اړتیا ده

د اوچا د معلوماتو له مخې، تر اوسه د افغانستان د بشري مرستو د روان پروګرام یوازې شاوخوا ۲۶ سلنه اړینه بودجه برابره شوې ده

اولګا چروکو ټینګار کړی چې د نړیوالې ټولنې دوامداره ملاتړ ته اړتیا ده، څو مرستندویه ادارې وکولای شي د میلیونونو اړمنو افغانانو اړتیاوو ته رسېدنه وکړي

ملګري ملتونه او مرستندویه بنسټونه له اوږدې مودې راهیسې د افغانستان د بشري وضعیت په اړه اندېښنه ښيي او وایي چې د اقتصادي ستونزو، بې‌وزلۍ او طبیعي پېښو له امله ګڼې کورنۍ مرستو ته اړتیا لري