نوي ډیلي : هند د سعودي، ترکیې او پاکستان دفاعي تړون له نږدې څاري

نوي ډیلي : هند د سعودي، ترکیې او پاکستان دفاعي تړون له نږدې څاري

 بریانیوز/ دوشنبه ( ۱۹ / اسد /۱۴۰۵هـ.ش)

نوي ډیلي – هند وايي، د سعودي عربستان، ترکیې او پاکستان ترمنځ د «مکې ګډ دفاعي تړون» په اړه له نږدې څارنه کوي او د دې درې اړخیز امنیتي تړون وروستي پرمختګونه ارزوي

د هند د بهرنیو چارو وزارت ویلي، نوي ډیلي د دغه تړون په اړه خپل نظر په دوامداره توګه تازه کوي او د تړون احتمالي اغېزې به په سیمه کې د امنیتي وضعیت له بدلونونو سره یوځای ارزوي

د راپورونو له مخې، د سعودي عربستان، ترکیې او پاکستان ترمنځ په شوي دفاعي تړون کې د ګډ امنیت اصل شامل دی. د دې اصل له مخې، پر یوه غړي هېواد هر ډول برید د ټولو غړو پر وړاندې برید ګڼل کېږي

دغه تړون په داسې حال کې د درېیو هېوادونو ترمنځ لاسلیک شوی چې د منځني ختیځ او سویلي اسیا امنیتي وضعیت له ګڼو ننګونو سره مخ دی

هند، چې له پاکستان سره اوږدمهاله امنیتي او سیاسي اختلافات لري، د دغه نوي دفاعي تفاهم په اړه ځانګړې پاملرنه کوي. د نوي ډیلي اندېښنه دا ده چې د پاکستان د نوي دفاعي تړونونو پراختیا ښايي د سیمې پر امنیتي توازن اغېز وکړي

له بلې خوا، د تړون ملاتړي هېوادونه ټینګار کوي چې موخه یې د ګډ امنیت پیاوړتیا، د دفاعي همکاریو پراختیا او د غړو هېوادونو پر وړاندې د احتمالي ګواښونو په وړاندې د ګډ دریځ رامنځته کول دي

د دې تړون عملي اغېزې به د راتلونکو میاشتو په اوږدو کې لا روښانه شي، خو د هند غبرګون ښيي چې نوي ډیلي د سعودي عربستان، ترکیې او پاکستان د دفاعي همکاریو پراختیا د سیمې د امنیتي معادلې له مهمو بدلونونو څخه ګڼي