اخبار جهان

یوناما: د طالبانو په امنیتي بنسټونو کې د څارنې او ځواب‌ویینې بهیر روڼتیا نه لري

اشتراک گذاری:

بریانیوز/ سه شنبه ( ۲۰ / اسد /۱۴۰۵هـ.ش)

کابل – په افغانستان کې د ملګرو ملتونو مرستندوی پلاوي (یوناما) په یوه تازه راپور کې ویلي چې د طالبانو په امنیتي بنسټونو کې د څارنې او ځواب‌ویینې چارې له کافي روڼتیا او شفافیت سره نه ترسره کېږي

یوناما په خپل ۳۸ مخیز راپور کې د ۲۰۲۱ کال له اګست میاشتې راهیسې د طالبانو د امنیتي ادارو کړنې ارزولې او د شکایتونو، قضايي اقداماتو او د امنیتي بنسټونو د حساب ورکونې په اړه یې د معلوماتو محدودیت د اندېښنې وړ بللی دی

د یوناما سرپرستې جورجیت ګانیون ویلي، د شکایتونو او قضايي بهیرونو په اړه د معلوماتو نه خپرول کولی شي د خلکو باور کمزوری کړي او د امنیتي ادارو د کړنو په اړه د پوښتنو د زیاتېدو لامل شي

نوموړې ټینګار کړی چې د قانون مساوي او عادلانه تطبیق د یوه سالمې ټولنې لپاره بنسټیز اهمیت لري او ټول وګړي باید د قانون پر وړاندې له یو ډول چلند څخه برخمن وي

د یوناما په راپور کې د امنیتي ادارو د حساب ورکونې، د شکایتونو د څېړلو او د قضايي بهیرونو د روڼتیا د پیاوړتیا پر اړتیا هم ټینګار شوی دی

ملګرو ملتونو ویلي چې د امنیتي ادارو د فعالیتونو په اړه روڼتیا او حساب ورکونه د خلکو د باور د ساتلو او د قانون د حاکمیت د پیاوړتیا لپاره مهم عناصر دي