صحّت

کابل : افغانستان کې د میندو د مړینې لوړه کچه لا هم جدي اندېښنه ده

اشتراک گذاری:

بریانیوز/ پنجشنبه ( ۲۲ / اسد /۱۴۰۵هـ.ش)

افغانستان کې د روغتیايي خدمتونو کمښت، خوارځواکۍ، اقتصادي ستونزو او روغتیايي مرکزونو ته د ښځو محدود لاسرسي له امله د امېندوارۍ او زېږون پر مهال د میندو د مړینې لوړه کچه لا هم د جدي اندېښنې وړ ده

د ملګرو ملتونو د ۲۰۲۳ کال د شمېرو له مخې، په افغانستان کې د هرو ۱۰۰ زره ژوندیو زېږونونو پر مهال ۵۲۱ میندې د امېندوارۍ، زېږون یا له زېږون وروسته د رامنځته کېدونکو ستونزو له امله خپل ژوند له لاسه ورکوي

روغتیايي کارپوهان وايي، د مسلکي روغتیايي کارکوونکو کمښت، د درملو او طبي وسایلو نشتوالی، روغتیايي مرکزونو ته د لاسرسي ستونزې او اقتصادي کمزوري هغه عوامل دي چې د میندو د مړینې خطر زیاتوي

په ځانګړي ډول په لرې پرتو سیمو کې ښځې د امېندوارۍ او زېږون پر مهال له جدي ستونزو سره مخ دي او ډېری وخت د بیړنیو روغتیايي خدمتونو ترلاسه کولو لپاره مناسب امکانات نه لري

د روغتیايي بنسټونو په وینا، د میندو د مړینې د کچې د راکمولو لپاره د روغتیايي مرکزونو پیاوړتیا، د قابله‌ګانو او نورو روغتیايي کارکوونکو روزنه، د بیړنیو خدمتونو پراخول او د امېندوارو ښځو لپاره د وړیا او باکیفیته روغتیايي خدمتونو برابرول اړین دي