سیاست

برلین : د افغان کډوالو د ایستلو پر ضد لاریون شوی

اشتراک گذاری:

بریانیوز/دو شنبه ( ۲۶ / اسد /۱۴۰۵هـ.ش)

برلین – د جرمني په پلازمېنه برلین کې یو شمېر افغانانو د افغان کډوالو د ایستلو په اړه د دغه هېواد د حکومت د پرېکړې پر ضد لاریون کړی دی

دغه لاریون د پښتون ژغورنې غورځنګ د غړو له لوري ترسره شوی او ګډونوالو یې له جرمني حکومت څخه غوښتي چې د افغان کډوالو د ایستلو پر پرېکړه له سره غور وکړي.

لاریونوالو د افغان کډوالو د وضعیت په اړه اندېښنه څرګنده کړې او ټینګار یې کړی چې د پناه غوښتونکو او کډوالو دوسیې باید د بشري حقونو، قانوني اصولو او د هر کس د ځانګړو شرایطو په پام کې نیولو سره وارزول شي.

دوی ویلي، هغه افغانان چې د ناامنۍ، ځورونې یا نورو جدي ګواښونو له امله یې له هېواده وتلي، باید داسې ځای ته بېرته ونه ستنول شي چېرته چې د هغوی ژوند او خوندیتوب له خطر سره مخ کېدای شي.

دغه لاریون په داسې مهال ترسره کېږي چې په جرمني او د اروپا په یو شمېر نورو هېوادونو کې د کډوالۍ د سیاستونو په اړه بحثونه تود شوي دي. د افغان کډوالو د استوګنې، پناه غوښتنې او بېرته ستنولو موضوع هم د دغو بحثونو له مهمو برخو څخه ده.