مقاله

ریچارډ بېنېټ: د طالبانو محدودیتونه پر افغان ښځو پراخې رواني او ټولنیزې اغېزې لري

اشتراک گذاری:

بریانیوز/سه شنبه ( ۲۶ / اسد /۱۴۰۵هـ.ش)

کابل – د افغانستان لپاره د ملګرو ملتونو ځانګړي راپور ورکوونکي ریچارډ بېنېټ وايي، د طالبانو له لوري پر ښځو او نجونو لګېدلي محدودیتونه یوازې د هغوی د زده‌کړې او کار حقونه نه محدودوي، بلکې پراخې ټولنیزې او رواني اغېزې هم لري

بېنېټ له «افغانستان انټرنشنل» سره په خبرو کې ټینګار کړی چې افغان ښځې او نجونې باید د زده‌کړې او کار له بنسټیزو حقونو برخمنې شي او د ټولنې په بېلابېلو برخو کې د هغوی د ګډون زمینه برابره شي

نوموړي د طالبانو د واکمنۍ پنځمې کلیزې ته په نږدې کېدو سره افغان ښځو ته ډاډ ورکړی چې نړیواله ټولنه هغوی نه دي هېر کړي

د ملګرو ملتونو ځانګړي راپور ورکوونکي د ښځو پر رواني وضعیت د اوږدمهالو محدودیتونو د منفي اغېزو په اړه اندېښنه څرګنده کړې او ویلي یې دي چې د زده‌کړې، کار او ټولنیز مشارکت له حقونو محرومیت د ښځو پر ژوند او راتلونکي ژور اغېز کوي

بېنېټ د افغان ښځو مقاومت او د خپلو حقونو لپاره د هغوی مبارزه د خپلو هڅو له مهمو انګېزو څخه بللې او ټینګار یې کړی چې د ښځو د حقونو ملاتړ باید د نړیوالې ټولنې له لومړیتوبونو څخه پاتې شي