ذبیح‌الله مجاهد: د سعودي، ترکیې او پاکستان دفاعي تړون افغانستان ته ګواښ نه دی

ذبیح‌الله مجاهد: د سعودي، ترکیې او پاکستان دفاعي تړون افغانستان ته ګواښ نه دی

 بریانیوز دوشنبه ( ۹/ سنبله /۱۴۰۵هـ.ش)

 د طالبانو ویاند ذبیح‌الله مجاهد وايي، د سعودي عربستان، ترکیې او پاکستان ترمنځ نوی دفاعي تړون افغانستان ته د اندېښنې وړ نه دی او طالبان دغه هوکړه د ځان پر وړاندې ګواښ نه ګڼي

مجاهد له یوې هندي رسنۍ سره په مرکه کې ویلي، افغانستان له سعودي عربستان، ترکیې او پاکستان سره دښمني نه لري او د اسلامي هېوادونو ترمنځ هر ډول همکاري د سیمې لپاره مثبته بولي.

د سعودي عربستان، ترکیې او پاکستان ترمنځ د ګډ دفاعي تړون له مخې، پر یوه غړي هېواد هر وسله‌وال برید د ټولو درېیو هېوادونو پر وړاندې برید ګڼل کېږي. د تړون هدف د درې واړو هېوادونو ترمنځ د دفاعي همکارۍ او ګډ مخنیوي ځواک پیاوړتیا بلل شوې ده

مجاهد د کابل او اسلام‌اباد وروستیو نښتو ته په اشارې سره ویلي، د طالبانو په وینا لومړی برید د پاکستان له لوري شوی، خو کابل نه غواړي له پاکستان سره جګړه دوام وکړي او هڅه کوي موجودې ستونزې د خبرو او سیاسي لارو حل کړي

نوموړي ټینګار کړی چې افغانستان د جګړې پلوی نه دی او له ټولو هېوادونو سره د سوله‌ییزو اړیکو غوښتونکی دی

مجاهد په ورته وخت کې له هند سره د سوداګریزو او ډیپلوماټیکو اړیکو پر پراختیا هم ټینګار کړی او ویلي یې دي چې کابل غواړي له نوي ډیلي سره خپلې اړیکې لا پیاوړې کړي

د طالبانو د ویاند څرګندونې په داسې حال کې دي چې د سعودي عربستان، ترکیې او پاکستان دفاعي همکاري د سیمې د امنیتي وضعیت د بدلون په ترڅ کې د پام وړ شوې ده او د درې واړو هېوادونو چارواکي د ګډ دفاعي تړون د عملي کولو لپاره د نورو همکاریو په اړه هم خبرې کوي