سیاست

ټرمپ: ښايي د اطلس او آرام سمندرونو نومونه هم بدل کړو

اشتراک گذاری:

بریانیوز دوشنبه ( ۹/ سنبله /۱۴۰۵هـ.ش)

واشنګټن — د امریکا ولسمشر ډونالډ ټرمپ ویلي، ښايي د اطلس او یا آرام سمندر نومونه هم بدل کړي. نوموړي دا څرګندونې وروسته له هغې کړې دي چې د امریکا په رسمي جغرافیایي نقشو کې یې د اونټاریو جهیل نوم «امریکا جهیل» ته د بدلولو لپاره اجرائیوي فرمان لاسلیک کړ

ټرمپ د سپینې ماڼۍ په یوه غونډه کې ویلي، امریکا لا دمخه د «امریکا خلیج» او «امریکا جهیل» نومونه لري او ښايي راتلونکی ګام د یوه سمندر نوم بدلول وي. هغه په څرګندو ټکو ویلي چې کېدای شي د اطلس یا آرام سمندر نومونه، او حتی دواړه، بدل کړي

د اونټاریو جهیل د نوم بدلولو پرېکړه یوازې د امریکا د فدرالي ادارو لپاره عملي کېږي او کاناډا مکلفه نه ده چې نوی نوم ومني. د کاناډا چارواکو له دې اقدام سره مخالفت کړی او ټینګار یې کړی چې جهیل به د خپل تاریخي «اونټاریو» نوم په توګه یادوي

د ټرمپ د نوم بدلولو لړۍ د امریکا او کاناډا ترمنځ د سوداګریزو او سیاسي اړیکو د زیاتېدونکو ترینګلتیاوو په ترڅ کې روانه ده. د نومونو د بدلون مخالفان وايي، جغرافیایي نومونه یوازې اداري اصطلاحات نه دي، بلکې تاریخي او کلتوري ارزښت هم لري

د ټرمپ حکومت تر دې وړاندې هم د «مکسیکو خلیج» نوم د «امریکا خلیج» په نوم د بدلولو اقدام کړی و، چې هغه هم له نړیوالو او په ځانګړي ډول د مکسیکو له مخالفت سره مخ شوی و