سلامت و غذا

اروپايي ټولنه : په افغانستان کې د خوړو خوندیتوب لپاره ۱۵ میلیونه یورو مرسته اعلان کړه

اشتراک گذاری:

بریانیوز سه شنبه ( ۱۰/ سنبله /۱۴۰۵هـ.ش)

کابل — اروپايي ټولنې اعلان کړی چې په افغانستان کې د خوړو خوندیتوب، د خلکو د معیشت پیاوړتیا او د اقلیمي بدلونونو پر وړاندې د ټولنو د مقاومت د زیاتولو لپاره به ۱۵ میلیونه یورو اضافي مرسته وکړي

د اروپايي ټولنې په وینا، دغه نوې مالي مرسته د ملګرو ملتونو د خوړو نړیوال پروګرام له لارې لګېږي او موخه یې دا ده چې له زیان‌منو افغان کورنیو سره د خوړو د خوندیتوب په برخه کې مرسته وشي او د اقلیمي بدلونونو پر وړاندې د هغوی د مقاومت وړتیا لوړه شي

د دې مرستې یوه برخه به د خلکو د معیشت د پیاوړتیا، د خوړو د تولید د ملاتړ او د هغو ټولنو د اقتصادي مقاومت د زیاتولو لپاره وکارول شي چې د وچکالۍ، سېلابونو او نورو اقلیمي ستونزو له اغېزو سره مخ دي

اروپايي ټولنه وايي، افغانستان لا هم له پراخو بشري او اقتصادي ننګونو سره مخ دی او د خوړو د خوندیتوب د پیاوړتیا لپاره نړیوال ملاتړ ته اړتیا لري

د خوړو نړیوال پروګرام هم ټینګار کوي چې دوامدارې مرستې او د معیشت د پیاوړتیا پروګرامونه کولی شي له افغان کورنیو سره مرسته وکړي چې د بېړنیو مرستو پر ځای په اوږدمهال کې پر خپلو عایداتي سرچینو تکیه وکړي