اخبار جهان

عباس عراقچي: که امریکا د ایران شرطونه ومني، د هرمز تنګی به په شپږو ورځو کې پرانیستل شي

اشتراک گذاری:

(بریانیو دوشنبه (۲۷/ میزان /۱۴۰۵هـ.ش

د ایران د بهرنیو چارو وزیر عباس عراقچي ویلي، د هرمز تنګي د بېرته پرانیستلو لپاره د تهران اووه ورځنی وړاندیز لا هم پر خپل ځای دی او که امریکا د ایران شرطونه ومني، دغه مهمه سمندري لار به په شپږو ورځو کې پرانیستل شي

عراقچي د یکشنبې په ورځ، د اکتوبر په ۱۸مه، په بغداد کې د اسلامي همکاریو سازمان د غړو هېوادونو د بهرنیو چارو وزیرانو د غونډې په څنډه کې ویلي، ایران خپل وړاندیز امریکا ته سپارلی او اوس د واشنګټن نظرونه ارزوي. نوموړي ټینګار کړی چې د هرمز تنګي د پرانیستلو لاره د امریکا د پرېکړې او د تهران د شرطونو منلو پورې تړلې ده

د ایران له مهمو شرطونو څخه د دغه هېواد پر بندرونو د امریکا د سمندري کلابند پای ته رسول، د ایران د تېلو پر صادراتو د بندیزونو لرې کول او په سیمه کې د جګړو درول یاد شوي دي

د وړاندیز له مخې، که امریکا دغه شرطونه ومني، د هرمز تنګی به په شپږمه ورځ د تګ راتګ لپاره پرانیستل شي او په اوومه ورځ به د دواړو هېوادونو ترمنځ خبرې اترې بېرته پیل شي

د هرمز تنګی د نړۍ د انرژۍ د لېږد له مهمو سمندري لارو څخه دی او له جګړې مخکې د نړۍ د تېلو او مایع طبیعي ګاز شاوخوا پنځمه برخه سوداګري له همدې لارې تېرېدله. د دې لارې د پرانیستلو په اړه اختلاف د ایران او امریکا ترمنځ د مذاکراتو له مهمو موضوعاتو څخه دی