د پاکستان د کورنیو چارو وزیر د طالبانو له لوړپوړي امنیتي چارواکي سره په تهران کې ولیدل — د تاوتریخوالي پر ځای د خبرو او تفاهم پیغام

کابل – د سیمه‌ ییزو سیاسي تحولاتـو په ترڅ کې، د افغانستان او پاکستان تر منځ ترینګلې اړیکې یو ځل بیا د خبرو له لارې د حل لپاره د نوې هڅې شاهده شوې. د پاکستان د کورنیو چارو وزیر سید محسن نقوي د طالبانو د کورنیو چارو وزارت له مرستیال او امنیتي مسؤل محمد ابراهیم صدر سره د تهران په ښار کې لیدنه کړې ده 

دغه لیدنه د اقتصادي همکاریو د سازمان (ECO) د کورنیو چارو وزیرانو د څلورمې ناستې په څنډه کې ترسره شوې، چیرته چې دواړو خواوو د سرحدي وضعیت، امنیتي همکارۍ، د کډوالو ستونزې، او د سیاسي اړیکو د بیا عادي کېدو په اړه خبرې کړې دي 

سرچینې وایي، دا لیدنه د هغه وروسته ترسره کېږي چې په تېرو څو اونیو کې د کابل او اسلام‌اباد اړیکې د بې‌ساري ترینګلتیا شاهده وې — د سرحدي نښتو، د افغان کډوالو د جبري شړلو، او د یو بل پر ضد د رسنیزو څرګندونو له امله دواړه هېوادونه د یوه بل پر وړاندې انتقادي دریځونه خپل کړي وو 

وزیر محسن نقوي، چې له یوې ایراني رسنۍ سره یې د دې ناستې په تړاو خبرې کړې، د نرم او مثبت پیغام په ورکولو ټینګار کړی او ویلي یې دي: 

اختلافونه په هر کور کې شته، خو هوښیار ملتونه خپلې شخړې د خبرو له لارې حلوي. موږ هم باور لرو چې د تفاهم او متقابل درناوي له لارې شته مسایل حل کېدای شي

نوموړي زیاته کړې، چې پاکستان غواړي له افغانستان سره د ګډو امنیتي او اقتصادي ګټو پر بنسټ، اړیکې د باور او همکارۍ په فضا کې پر مخ یوسي

په مقابل لور کې، د طالبانو د کورنیو چارو وزارت یو غړي د نوم نه ښودلو په شرط رسنیو ته ویلي، چې دغه لیدنه "په ښه فضا کې ترسره شوه" او دواړو لورو هوکړه کړې چې د ګډو ګټو په موخو د خبرو لړۍ دوام ومومي

شنونکي وايي، دا لیدنه که څه هم رسمي اعلامیه نه لري، خو د هغې نښه ده چې دواړه هېوادونه د اوږدې ترینګلتیا وروسته یو ځل بیا د خبرو له لارې د اړیکو د رغولو هڅه کوي.

د کابل پوهنتون د سیاسي علومو استاد، ډاکټر شفیع الله عمري، وايي

پاکستان او افغانستان دواړه یو له بله نه بېلېدونکي ګاونډیان دي. د فشار او تورونو پالیسۍ هېڅکله نتیجه نه ورکوي، خو د خبرو له لارې کولای شي له تاوتریخوالي ډک وضعیت بدل کړي

د تیرې میاشتې په وروستیو کې، د طالبانو او پاکستاني استازو تر منځ په استانبول کې د خبرو یوه بله ناسته ترسره شوې وه، خو د دواړو لورو د سختو دریځونو له امله بې‌نتیجې پای ته رسېدلې وه. اوس، د تهران ناسته د یوې نوې هڅې په توګه ګڼل کېږي چې ښايي د دواړو هېوادونو تر منځ د اړیکو د بیا رغېدو پیل شي

له بلې خوا، سیمه‌ییزې سرچینې وايي چې ایران، د منځګړیتوب رول لوبوي او هڅه کوي د کابل او اسلام‌اباد تر منځ د اړیکو د عادي کولو لپاره اعتماد رامنځته کړي

په تېرو دوو لسیزو کې، افغانستان او پاکستان وخت ناوخت د ګډو امنیتي اندېښنو، د تګ راتګ د اسانتیاوو، او د سوداګریزو اړیکو په برخه کې هوکړې کړې دي، خو د بې‌باورۍ فضا تل د دغو هوکړو د پلي کېدو مخه نیولې ده