د افغانستان د بشري مرستو صندوق ته د جرمني نوې مرسته

 د ملګرو ملتونو د بشري مرستو د همغږۍ دفتر (اوچا) اعلان کړی چې جرمني د افغانستان د بشري مرستو صندوق ته ۲ میلیونه یورو ځانګړي کړي دي، تر څو د طبیعي پېښو، ناڅاپي بحرانونو او دوامدارو بشري ستونزو له امله زیانمنو شویو خلکو ته بېړنی ملاتړ برابر شي

د اوچا د معلوماتو له مخې، د افغانستان په ګڼو ولایتونو کې بشري اړتیاوې لا هم «پراخې او بېړنۍ» دي. دا اړتیاوې د ژور فقر، لوړې بې‌کارۍ او هغو سختو محدودیتونو پایله بلل کېږي چې د طالبانو ادارې د خلکو پر ورځني ژوند لګولي دي؛ محدودیتونه چې د عاید سرچینې یې راکمې کړې او د میلیونونو کورنیو د ژوند چارې یې له سختو ننګونو سره مخ کړې دي

 بشري بنسټونه وایي چې دا مالي مرسته به د خوړو خوندیتوب، بېړنیو مرستو، روغتیايي خدمتونو او د ناورینونو پر وړاندې د خلکو د چمتووالي په برخو کې ولګول شي. جرمني د افغانستان له سترو مرسته کوونکو هېوادونو څخه شمېرل کېږي او تل یې ټینګار کړی چې د افغانستان د خلکو ملاتړ باید له سیاسي اختلافونو بېل وساتل شي

خو له دې مرستو سره هممهاله، جدي پوښتنې راپورته کېږي. شنونکي او د مدني ټولنې فعالان پوښتي چې د طالبانو د سختو محدودیتونو، د شفافیت د نشتوالي او د څار د کمزورې مېکانېزمونو په شتون کې، دا مرستې څنګه په عادلانه او اغېزمن ډول مستحقو کسانو ته رسېدای شي؟

 د بشري چارو کارپوهان ټینګار کوي چې د نړیوالو مرستو بریالیتوب یوازې له مالي ژمنتیا سره نه تړل کېږي، بلکې روښانه میکانېزمونو، خپلواک څار، او د مرستو د وېش پر بهیر د بشپړې شفافیت غوښتنه هم اړینه ده. د هغوی په وینا، که دا اصول په پام کې ونه نیول شي، نو شته مرستې به ونه شي کولای د خلکو د کړاو کچه راکمه کړي

سره له دې، د افغانستان ډېری بېوزله کورنۍ لا هم له نړیوالې ټولنې هیله لري چې د دوی غږ واوري، مرستې زیاتې کړي او ډاډ ترلاسه کړي چې هره مرسته د سیاست تر سیوري بهر، رښتینو اړمنو ته رسېږي. د هغوی په باور، انساني مرستې هغه وخت اغېزمنې وي چې له عدالت، شفافیت او د خلکو له واقعي اړتیاوو سره سمون ولري