طالبان د جوماتونو په جوړولو غواړي خپل دیني مشروعیت ثابت کړي؛ د کابل په یوه سیمه کې د جامع جوماتونو ترمنځ بل لوی جومات جوړېږي
د کابل ښار په زړه، سرزېرزميني سیمه کې، د عبدالرحمن تاریخي جومات شاوخوا ۴۰ مترۍ کې، د سړک بلې غاړې ته د یوه بل دوه منزله جومات د جوړولو چارې د بشپړېدو په حال کې دي.
بریانیوز- شنبه ١ قوس ١٤٠٥
دا جومات د اطلاعاتو او فرهنګ وزارت د پخوانۍ ودانۍ او اوس د طالبانو د خوړو او درملو ادارې په انګړ کې جوړېږي. د یاد جومات موقعیت د مخابراتو وزارت او د خوړو او درملو ادارې ترمنځ دی.
د دغه جومات انځور وروسته له هغې پر ټولنیزو شبکو خپور شوی، چې په کابل کې د چمن حضوري په تاریخي سیمه کې د ځاځیانو جامع جومات، د تبلیغیانو جومات، عیدګاه جومات او یوه بل جومات په منځ کې د طالبانو د مشر ملا هبتالله له لوري د یوه بل لوی جومات د جوړولو خبر خپور شو.
د دغو جوماتونو د جوړولو په اړه یو شمېر خلکو د طالبانو د حکومت پر لومړیتوبونو نیوکې کړې او پوښتنه یې راپورته کړې چې په داسې یوه سیمه کې، چې په څو قدمۍ کې یې لوی او مجهز جامع جوماتونه موجود دي، د یوه بل لوی جومات جوړولو ته څه اړتیا ده؟
دوی پوښتنه کوي چې ایا د افغانستان خلک د نویو جوماتونو او مدرسو جوړولو ته تر دې ډېرې اړتیا لري، که د هېواد اقتصادي وضعیت، بېکاري، روغتیايي ستونزې او د عامه خدمتونو کمښت داسې لومړیتوبونه دي چې باید ورته پام وشي؟
د نیوکهکوونکو په باور، د دغو ودانیو لپاره د لګول کېدونکو پیسو پر ځای د فابریکو، روغتونونو، تفریحي پارکونو او د کارموندنې مرکزونو جوړول کولای شي د خلکو د ژوند په ښه کولو کې اغېزمن رول ولوبوي.
بلخوا، بریانیوز د خپلو سرچینو په حواله راپور ورکړی، چې د طالبانو د مشرانو ترمنځ د جوماتونو او مدرسو جوړولو په نوم د نفوذ او ځواک ښودلو سیالي روانه ده.
د دغه راپور د سرچینو په وینا، د طالبانو یو شمېر مشران د بهرنیو هېوادونو څخه د مالي مرستو د ترلاسه کولو لپاره د مدرسو او جوماتونو جوړولو ته مخه کوي. سرچینې دا وضعیت د پخواني جمهوري نظام له هغې سیالۍ سره پرتله کوي، چې د بهرنیو مرستو او پروژو د ترلاسه کولو لپاره د بېلابېلو موسسو او بنسټونو د جوړولو بهیر پکې روان و.
سرچینې زیاتوي، چې د طالبانو په حکومت کې د دغې سیالۍ بڼه بدله شوې او اوس د جوماتونو او مدرسو جوړول د ځینو مشرانو لپاره د نفوذ او ځواک ښودلو په وسیله بدل شوي دي.
سره له دې، د عبدالرحمن تاریخي جومات په شاوخوا ۴۰ مترۍ کې د یوه بل لوی دوه منزله جومات جوړول، په داسې حال کې چې په سیمه کې د زرګونو لمونځ کوونکو د لمانځه لپاره مجهز جامع جوماتونه شته، د دې پروژې د اړتیا، لګښتونو، مالي سرچینو او د حکومت د لومړیتوبونو په اړه جدي پوښتنې راپورته کوي.
برای نظر دادن باید ثبتنام کرده یا وارد شده باشید ورود?