د عراق او افغانستان سیوری د ونزویلا پر وړاندې د امریکا پر نوې تګلارې

نړیوال – د نشنل مجلې په یوه تحلیلي مقاله کې خبرداری ورکړی، چې د ونزویلا پر وړاندې د امریکا وروستۍ تګلاره، په ځانګړي ډول د ډونالډ ټرمپ د ولسمشرۍ په نوې دوره کې، له هغو خطرناکو لارو سره اندېښمنوونکې ورته‌والی لري چې پخوا یې امریکا د عراق او افغانستان پر اوږدو، لګښتناکو او ناکامو جګړو کې ښکېله کړه

د مقالې له مخې، د واشنګټن له لوري د ګواښ ډک ادبیات، د «ډله‌ییزې وژنې وسلو» د موضوع بیا راژوندي کول، او د یوه بهرني حکومت د تروریزم او د مخدره توکو له قاچاق سره تړل، هغه پېژندل شوی سیاسي روایت راپه یادوي چې د ۲۰۰۳ کال د عراق د یرغل لپاره ترې کار واخیستل شو

لیکوالان ټینګار کوي، چې دا ډول ادعاوې، که له کره او شفافو شواهدو پرته مطرح شي، کولای شي نړیوال افکار د یوې نوې پوځي مداخلې پر لور سوق کړي؛ داسې مداخله چې پایلې یې ممکن د عراق او افغانستان په څېر ناورین‌زېږونکې وي. د یادو جګړو پایلې نه یوازې د امریکا لپاره درنې انساني او مالي لګښتونه درلودل، بلکې د سیمو ثبات یې هم کلونه ګډوډ کړ

په مقاله کې راغلي، چې ونزویلا که څه هم له جدي اقتصادي او سیاسي ستونزو سره مخ ده، خو د پوځي فشار او دښمنانه ژبې کارول به وضعیت لا پسې پېچلی کړي او د دیپلوماسۍ دروازې به وتړي. شنونکي باور لري، چې د بندیزونو، ګواښونو او د «دښمن جوړونې» سیاست پر ځای، د خبرو اترو او نړیوالو سیاسي حل‌لارو کارول کولای شي اغېزمن او دوامدارې پایلې ولري

نشنل مجله پایله اخلي، چې که امریکا له تېرو تجربو – په ځانګړي ډول له عراق او افغانستان – زده‌کړه و نه کړي، نو د ونزویلا پر وړاندې د سخت دریځ دوام به نه یوازې د لاتیني امریکا لپاره، بلکې د نړیوال امنیت لپاره هم نوې ستونزې وزېږوي