د اسد له پرځېدو وروسته د سوریې خونړی پړاو؛ د جولاني په دوره کې د ۱۳۰۰ څخه ډېرې وژنې ثبت شوې

د سوریې د بشري حقونو څار بنسټ اعلان کړی، چې د بشار اسد د نظام له پرځېدو وروسته په سوریه کې د تاوتریخوالي نوې او خونړۍ څپه پیل شوې ده. د یاد بنسټ د راپور له مخې، د جولاني تر واکمنۍ لاندې په بېلابېلو سیمو کې تر دې دمه له ۱۳۰۰ څخه ډېر د قتل او عامو وژنو پېښې ثبت شوې دي

راپور وايي، دا وژنې په پراخه جغرافیه کې رامنځته شوې او ډېری قربانیان ملکي وګړي دي، چې د امنیتي خلا، د وسله‌والو ډلو د سیالیو او د قانون د نشتون له امله خپل ژوند له لاسه ورکړی دی. د بشري حقونو څار بنسټ خبرداری ورکړی، چې روان وضعیت د سوریې د خلکو لپاره یو نوی انساني ناورین زېږولی دی

د څار بنسټ په وینا، د واک بدلون د خلکو لپاره د سولې او ثبات هیله راپارولې وه، خو پر ځای یې د بې‌ثباتۍ، انتقامي بریدونو او هدفمندې وژنې زیاتې شوې دي. دغه بنسټ ټینګار کوي، چې د جولاني تر ادارې لاندې امنیتي ځواکونه نه دي توانېدلي د ولسي وګړو خوندیتوب تضمین کړي

راپور همداراز څرګندوي، چې په ځینو سیمو کې کورنۍ د دوامدارې وېرې تر سیوري لاندې ژوند کوي، زرګونه کسان بې‌ځایه شوي او د بنسټیزو خدمتونو نشتون د خلکو کړاوونه لا زیات کړي دي. د بشري حقونو فعالان وایي، که نړیواله ټولنه بېړنی او جدي اقدام ونه کړي، ښايي د تاوتریخوالي دا لړۍ لا پراخه شي

د سوریې د بشري حقونو څار بنسټ پر نړیوالو بنسټونو غږ کړی، چې د روانو وژنو خپلواکه څېړنه وکړي، د ملکي وګړو د ساتنې لپاره عملي ګامونه واخلي او د سوریې د خلکو د حقونو د خوندیتوب لپاره د حساب‌ورکونې بهیر فعال کړي

د راپور په پای کې ویل شوي، چې تر هغه چې په سوریه کې یو ټول‌شموله سیاسي حل، قانون واکمني او د خلکو خوندیتوب تضمین نه شي، دا هېواد به له خونړیو پړاوونو څخه د وتلو په حال کې پاتې شي