شمالي کوریا د کوریا ټاپووزمې د پوځي کړکېچ د زیاتېدو خبرداری ورکړ

د شمالي کوریا حکومت په یوه رسمي اعلامیه کې د کوریا ټاپووزمې پر سر د پوځي تاوتریخوالي د زیاتېدو په اړه جدي خبرداری ورکړی او د امریکا د متحدو ایالتونو پوځي حضور او تحرکات یې د روانو کړکېچونو اصلي لامل بللي دي

د پیونګ‌یانګ په وینا، د واشنګټن وروستي پوځي اقدامات، په ځانګړي ډول د ستراتیژیکو وسلو ځای پر ځای کول، د سیمې امنیت له جدي ګواښ سره مخ کوي او د اټومي بې‌ثباتۍ خطر زیاتوي. شمالي کوریا وایي، دا ډول کړنې نه یوازې د سولې فضا زیانمنوي، بلکې د شخړو د پراخېدو احتمال هم لوړوي

په اعلامیه کې په ځانګړي ډول د امریکا د یوه اټومي بریدګرې اوبتل د سویلي کوریا د بوسان بندر ته د داخلېدو یادونه شوې ده؛ هغه اقدام چې پیونګ‌یانګ یې «تحریکوونکی» بللی او د سیمې د پوځي توازن پر ضد یې ګام ګڼلی د

شمالي کوریا همدارنګه د امریکا او سویلي کوریا ترمنځ پر پوځي همکاریو نیوکه کړې او ویلي یې دي، چې دا ګډ تمرینونه او فشارونه به دغه هېواد له خپلو دریځونو پر شا نه کړي. د پیونګ‌یانګ په ټینګار، که امریکا او متحدین یې د فشار سیاست ته دوام ورکړي، نو د کوریا ټاپووزمه به له لا ډېرو خطرناکو حالاتو سره مخ شي

دا څرګندونې په داسې حال کې کېږي، چې په وروستیو میاشتو کې د امریکا، سویلي کوریا او جاپان ترمنځ پوځي همغږي زیاته شوې او ورسره د شمالي کوریا او لوېدیځ ترمنځ لفظي شخړې هم توندې شوې دي. څارونکي خبرداری ورکوي، چې د خبرو د لارې پرانیستل او د تاوتریخوالي کمول د سیمې د ثبات لپاره حیاتي ارزښت لري