هند او پاکستان د اتومي تاسیساتو لېستونه تبادله کړل؛ د باور جوړونې دوامداره ګام

د هند د بهرنیو چارو وزارت په یوه رسمي اعلامیه کې ویلي، چې هند او پاکستان د پنجشنبې په ورځ د ډیپلوماتیکو چینلونو له لارې د خپلو اتومي تاسیساتو او اړوندو کارځایونو بشپړ لېستونه یو بل ته وسپارل. دا تبادله د دواړو هېوادونو ترمنځ د یوې مهمې هوکړې له مخې شوې، چې موخه یې د اتومي تاسیساتو خوندي ساتل او د هر ډول احتمالي برید مخنیوی دی

د اعلامیې له مخې، دا اقدام د هغو ژمنو پر بنسټ ترسره شوی، چې هند او پاکستان د ۱۹۸۸ کال د دسمبر پر ۳۱مه لاسلیک کړې وې. یاد تړون وروسته د ۱۹۹۱ کال د جنورۍ پر ۲۷مه نافذ شو او له هماغه مهاله راهیسې د دواړو هېوادونو ترمنځ د باور جوړونې له مهمو اقداماتو څخه ګڼل کېږي

د تړون له شرایطو سره سم، دواړه هېوادونه مکلف دي چې هر کال د جنورۍ پر لومړۍ نېټه یو بل ته د هغو اتومي تاسیساتو، فابریکو او کارځایونو په اړه معلومات شریک کړي، چې د دې هوکړې تر چتر لاندې راځي. دا بهیر د شفافیت د زیاتوالي، د غلطو محاسبو د مخنیوي او د سیمه‌ییز امنیت د ټینګښت لپاره حیاتي ارزښت لري

سږنۍ تبادله د هند او پاکستان ترمنځ ۳۵مه پرلپسې تبادله بلل کېږي، چې دا خپله د دې هوکړې د دوام او عملي کېدو څرګندونه کوي. د تاریخ له مخې، دا ډول لېستونه لومړی ځل د ۱۹۹۲ کال د جنورۍ پر لومړۍ نېټه د دواړو هېوادونو ترمنځ شریک شول او له هغه راوروسته، سره له سیاسي اختلافونو او ترینګلتیاوو، دا بهیر بې‌درېغه روان پاتې شوی دی

سیاسي شنونکي باور لري، چې که څه هم د نوي ډیلي او اسلام‌اباد ترمنځ اړیکې ډېر وخت له تاوتریخوالي، بې‌باورۍ او ډیپلوماتیکو خنډونو سره مخ وي، خو د اتومي تاسیساتو د لېستونو منظم تبادله د اړیکو له هغو محدودو خو مهمو چینلونو څخه ده، چې لا هم فعال دي. د کارپوهانو په اند، دا ډول ګامونه د جنوبي اسیا د اټومي سیالۍ په فضا کې د خطرونو د راکمولو او د ناڅاپي کړکېچونو د مخنیوي لپاره ځانګړی ارزښت لري.

په ورته وخت کې، نړیوالې ټولنې تل د هند او پاکستان له دې اقدام هرکلی کړی او دا یې د سیمې د ثبات او د اتومي وسلو د خوندي مدیریت پر لور یو مثبت او مسؤلانه ګام بللی دی