مسکو – د روسیې د بهرنیو چارو وزیر سرګي لاوروف پر امریکا سختې نیوکې وکړې؛ «واشنګټن نړیوال نظم او قوانین کمزوري کوي

بریانیوز:(پنجشنبه۲۵جدی۱۴۰۴) مسکو – د روسیې د بهرنیو چارو وزیر سرګي لاوروف امریکا تورنه کړې چې د خپلو وروستیو کړنو له لارې نړیوال نظم او د نړیوالو قوانینو بنسټونه کمزوري کوي. لاوروف دا څرګندونې د چهارشنبې په ورځ، د جدې ۲۴مه، وکړې او ویې ویل هغه نړیوال نظام چې یو وخت خپله امریکا د جوړولو مهم رول پکې درلود، اوس یې همدا هېواد په قصدي ډول زیانمنوي

د روسیې د بهرنیو چارو وزیر وویل، واشنګټن په وروستیو کلونو کې په پرله‌پسې توګه له نړیوالو قوانینو سرغړونه کړې او داسې اقدامات یې کړي چې نه یوازې د ملګرو ملتونو له منشور سره په ټکر کې دي، بلکې د نړیوال ثبات لپاره هم جدي ګواښ بلل کېږي. د لاوروف په وینا، امریکا نور هغه اصول نه عملي کوي چې کلونه یې د نړۍ لپاره د «دیموکراسۍ، قانون او نړیوال نظم» تر نامه لاندې تبلیغول

لاوروف د بېلګې په توګه د امریکا هغه څه یاد کړل چې نوموړي یې «غیرقانوني عملیات» بولي؛ هغه هڅې چې د وینزویلا د ولسمشر نیکولاس مادورو د حکومت د نسکورولو لپاره شوې دي. د هغه په وینا، دا ډول مداخلې د هېوادونو د ملي حاکمیت ښکاره سرغړونه ده. نوموړي همدارنګه د ایران پر وړاندې د امریکا د پوځي بریدونو ګواښونه د نړیوالو قوانینو ښکاره نقض وباله

د روسیې د بهرنیو چارو وزیر ټینګار وکړ چې مسکو به له خپل متحد وینزویلا سره خپلو ټولو سیاسي، اقتصادي او امنیتي تړونونو ته وفادار پاتې شي. لاوروف وویل، روسیه د هېوادونو د خپلواکۍ، ملي حاکمیت او د نړیوالو اصولو د درناوي پلوي ده او اجازه نه ورکوي چې یو هېواد د زور له لارې پر نورو خپله اراده وتپي

لاوروف دا هم وویل چې امریکا د هغو اصولو په پرېښودو سره چې پخوا یې خپله د نړیوال سیاست د بنسټ په توګه معرفي کول، خپل اعتبار او باور ته جدي زیان رسولی دی. د هغه په اند، دا چلند د امریکا د نړیوال مقام د کمزورېدو لامل شوی او ډېر هېوادونه نور واشنګټن د باور وړ شریک نه ګڼي

په همدې لړ کې، د اوکراین د جګړې په اړه د بلومبرګ د راپور په غبرګون کې، لاوروف وویل چې د روسیې ولسمشر ولادیمیر پوتین د اوکراین د جګړې د حل لپاره د جدي او معنا لرونکو خبرو اترو ته چمتو دی. هغه زیاته کړه، که امریکا د سولې په اړه رښتینې طرحې او وړاندیزونه لري، نو باید هغه په مستقیم ډول له مسکو سره شریک کړي، نه دا چې د رسنیو له لارې غیررسمي پیغامونه ولېږي

سیاسي شنونکي باور لري چې د لاوروف دا څرګندونې د روسیې او امریکا ترمنځ د ژور سیاسي اختلاف څرګند انعکاس دی. د دوی په وینا، مسکو هڅه کوي ځان د نړیوالو قوانینو مدافع وښيي او واشنګټن د نړیوال بې‌ثباتۍ اصلي لامل معرفي کړي، په داسې حال کې چې د اوکراین جګړه، د منځني ختیځ کړکېچ او د لاتینې امریکا وضعیت د دواړو قدرتونو ترمنځ سیالي لا پسې تېزه کړې ده

په ټوله کې، د سرګي لاوروف وروستۍ څرګندونې ښيي چې د روسیې او امریکا ترمنځ د باور فضا لا هم خورا زیانمنه ده. که څه هم مسکو د سولې خبرو ته د چمتووالي خبره کوي، خو شنونکي وایي چې تر هغو چې دواړه لوري په عملي ډول د مستقیمو خبرو مېز ته کېنني، د نړیوالو کړکېچونو د حل لپاره به د پام وړ بدلون رامنځته نه شي