د مالیزیا لومړي وزیر او حامد کرزي د ښاغلي «حکمتیار» د روغتیا لپاره دعا وکړه

د مالیزیا لومړي وزیر او حامد کرزي د ښاغلي «حکمتیار» د روغتیا لپاره دعا وکړه

بریانیوز:( یکشنبه۲۸ جدی۱۴۰۴) حامد «کرزی»، د افغانستان پخواني ولسمشر، په خپلې اېکس پاڼه کې په یوه پیغام کې د حزب اسلامی افغانستان د مشر او د هېواد له مطرح سیاسي څېرو څخه د ښاغلي ګلبدین «حکمتیار» د روغتیا لپاره دعا کړې ده.

حامد کرزي لیکلي دي: «خبر شوم چې محترم ګلبدین حکمتیار، جهادي مشر او د حزب اسلامی افغانستان رئیس، له هېواده بهر تر درملنې لاندې دی. له لوی خدایه د هغه لپاره د بشپړې روغتیا او سلامتیا هیله کوم.»

د اسلامي حزب ته نږدې سرچینو د راپور له مخې، پرون د شنبې په ورځ د جدي ۲۷مه، د مالیزیا لومړي وزیر ډاکټر انور ابراهیم هم د ګلبدین حکمتیار د پوښتنې لپاره روغتون ته ورغلی و.

د مالیزیا لومړي وزیر ګلبدین حکمتیار خپل «زوړ ملګری» بللی او د هغه لپاره یې د بشپړې شفا او دوامدارې روغتیا دعا کړې ده.

حبیب الرحمن «حکمتیار» هم پرون د شنبې په ورځ د خپل پلار، انجنیر ګلبدین «حکمتیار»، د بشپړې روغتیا خبر ورکړی و.

حبیب الرحمن «حکمتیار» د ګلبدین «حکمتیار» له یوه عکس سره په خپله رسمي فېسبوک پاڼه کې لیکلي دي: «الحمدالله د محترم حکمتیار روغتیا ښه ده او هېڅ د اندېښنې ځای نشته.»

ښاغلی حکمتیار د خپلې ناروغۍ د درملنې لپاره مالیزیا ته تللی او دا مهال تر درملنې لاندې دی.

ګلبدین «حکمتیار» د حزب اسلامی افغانستان رهبر په تېرو څلورو کلونو کې په افغانستان کې اوسېدلی او د اسلامي امارت د سرپرست حکومت پر ځینو سیاستونو یې نیوکې کړې دي.

نوموړي د سیاسي بحران د حل او په هېواد کې د مشروع او ملي نظام د رامنځته کېدو لپاره د اساسي قانون د تدوین، د شفافو ټاکنو د ترسره کېدو او د ولس د استازو له خوا د منتخب ملي شورا د جوړېدو غوښتنه کړې ده.

هغه همدارنګه همیشه د ښځو او نجونو د زده‌کړو او تعلیم څخه پر محرومیت نیوکه کړې ده. تر دې وړاندې، اسلامي حزب ته نږدې سرچینو ویلي وو چې د اسلامي امارت سرپرست حکومت هغه بهر ته له سفر کولو او همدارنګه له سیاسي لیدنو او څرګندونو منع کړی و.