د امریکا د خزانې وزیر پر اروپايي هېوادونو بې‌ساري توند برید؛ «دا احمقانه معاملې د پوتین د جګړې ماشین ژوندی ساتي»

بريانيوز:(جمعه ۳دلو ۱۴۰۴)  د امریکا د خزانې وزیر په خورا صریح، توند او له ډیپلوماټیکو ملاحظو لرې دریځ کې پر یو شمېر اروپايي هېوادونو سختې نیوکې کړې دي، چې د هند له لوري تولید شوي هغه نفتي محصولات اخلي چې د روسیې له خامو تېلو څخه جوړ شوي دي. نوموړي خبرداری ورکړی چې دا ډول معاملې، که څه هم په ظاهري ډول د بندیزونو له چوکاټ سره سمون لري، خو په عملي ډول د روسیې لپاره د جګړې د دوام مالي سرچینې برابروي

د امریکا د خزانې وزیر ویلي، لوېدیځ نشي کولی له یوې خوا پر روسیې اقتصادي بندیزونه ولګوي او له بلې خوا د غیرمستقیمو لارو د هغو پیسو جریان ته اجازه ورکړي چې د اوکراین پر وړاندې د جګړې اور ته تېل ور اچوي. هغه په ښکاره ډول ویلي:

دا یو احمقانه اقدام دی. تاسو نشئ کولی ځان د اوکراین ملاتړی وبولئ، خو په عین حال کې د پوتین د جګړې ماشین تمویل کړئ

د روسیې تېل، هند او اروپايي بازارونه

د امریکا د خزانې وزارت د معلوماتو له مخې، روسیه له بندیزونو وروسته خپل خام تېل په پراخه کچه او په ټیټو بیو هند ته صادروي. هند دغه خام تېل په خپلو لویو تصفیه‌خانو کې پروسس کوي او بیا یې د ډیزلو، پټرولو او نورو نفتي محصولاتو په بڼه اروپايي هېوادونو ته صادروي. دا بهیر له حقوقي پلوه د بندیزونو ښکاره سرغړونه نه بلل کېږي، خو د واشنګټن په وینا، له اخلاقي او سیاسي اړخه د بندیزونو روحیه تر پښو لاندې کوي

د امریکا د خزانې وزیر ټینګار کړی چې دا ډول سوداګریزې معاملې روسیې ته میلیاردونه ډالر عاید برابروي، هغه پیسې چې د اوکراین پر ښارونو د توغندیو، بې‌پیلوټه الوتکو او درنو وسلو د بریدونو لپاره کارول کېږي. د هغه په وینا، تر هغو چې دا مالي لارې پرانیستې وي، د جګړې د پای ته رسېدو هیله به کمزورې پاتې شي

اروپا تر فشار لاندې

واشنګټن له اروپايي اتحادیې غوښتي چې د خپلو انرژۍ پالیسیو جدي بیاکتنه وکړي او د هند له لارې د روسي تېلو پر بنسټ تولید شویو محصولاتو پېرود ته د پای ټکی کېږدي. د امریکا د خزانې وزیر ویلي، که اروپا غواړي د اوکراین ملاتړ یوازې شعار نه، بلکې عملي دریځ وي، نو باید د انرژۍ په برخه کې قربانۍ ته هم چمتو شي

هغه زیاته کړې:

موږ درک کوو چې اروپا د انرژۍ له ستونزو سره مخ ده، خو ارزانه انرژي باید د زرګونو اوکرایني ملکي وګړو د وینو په بیه ترلاسه نه شي

سیاسي او ستراتیژیک اختلافات

شنونکي وایي، د امریکا دا توند دریځ د واشنګټن او بروکسل ترمنځ د انرژۍ او بندیزونو پر سیاستونو ژور اختلافات بربنډوي. اروپا له یوې خوا هڅه کوي د انرژۍ اړتیاوې په ټیټه بیه پوره کړي، خو له بلې خوا د اوکراین جګړه د لوېدیځ لپاره یوه اخلاقي، سیاسي او ستراتیژیکه ازموینه ګرځېدلې ده

د سیاسي څېړونکو په باور، د هند رول هم په دې معادله کې مهم دی. هند ځان بې‌طرفه بولي، خو د روسیې له تخفیفي تېلو څخه یې پراخه استفاده کړې او دا چاره د لوېدیځ له سختو نیوکو سره مخ شوې ده. سره له دې، دهلي‌نو ټینګار کوي چې خپلې انرژۍ اړتیاوې د ملي ګټو پر بنسټ تنظیموي

راتلونکی بهیر

دا څرګندونې په داسې حال کې کېږي چې د اوکراین جګړه لا هم روانه ده او روسیه، سره له دې چې له سختو بندیزونو سره مخ ده، لا هم د انرژۍ له صادراتو ستر عاید ترلاسه کوي. د امریکا د خزانې وزارت باور لري چې که اروپايي هېوادونه د دې غیرمستقیمو معاملاتو مخه ونه نیسي، نو د بندیزونو اغېز به ورځ تر بلې کمزوری شي

تر اوسه د اروپايي اتحادیې چارواکو د امریکا د خزانې وزیر د دغو تندو څرګندونو په اړه رسمي غبرګون نه دی ښودلی، خو تمه ده چې دا موضوع به د امریکا او اروپا ترمنځ په راتلونکو ډیپلوماټیکو غونډو کې د جدي بحث او احتمالي سیاسي شخړې لامل شي

شنونکي وایي، دا لانجه ښيي چې د اوکراین جګړه یوازې په جګړه‌ییز ډګر کې نه، بلکې د انرژۍ، اقتصاد او نړیوال سیاست په ډګر کې هم د لوېدیځ ترمنځ د باور او همغږۍ سخت ازمیښت ګرځېدلې ده