په افغانستان کې د سختو واورو او بارانونو قربانیان ۶۱ کسانو ته ورسېدل؛ سلګونه کورنۍ بېړنیو مرستو ته اړتیا لري

بریانیوز:(دوشنبه ۶دلو۱۴۰۴)  کابل – د طالبانو د طبیعي پېښو پر وړاندې د مبارزې ادارې اعلان کړی، چې د افغانستان په بېلابېلو ولایتونو کې د وروستیو درېیو ورځو سختو واورو او دوامدارو بارانونو له امله د وژل شویو کسانو شمېر ۶۱ تنو ته لوړ شوی او لږ تر لږه ۱۱۰ کسان ټپیان شوي دي

د یادې ادارې ویاند، محمدیوسف حماد، د شنبې په ورځ، د دلوې په ۴مه، رسنیو ته ویلي، چې دغه طبیعي پېښو پراخ ځاني او مالي زیانونه اړولي دي. د هغه په وینا، د واورو او بارانونو له امله تر اوسه ۴۵۸ استوګنیز کورونه په بېلابېلو ولایتونو کې په بشپړ یا نیمه ډول ویجاړ شوي دي.

 حماد زیاته کړې، چې په تېرو درېیو ورځو کې لږ تر لږه ۳۶۰ کورنۍ په مستقیم ډول له دغو پېښو اغېزمنې شوې دي او دا مهال د سرپناه، خوړو، درملو او نورو بېړنیو بشري مرستو جدي اړتیا لري.

 د نوموړي په وینا، وروستیو واورو او بارانونو د هېواد په ګڼو ولایتونو کې خلکو ته مرګ‌ژوبله او درانه مالي زیانونه اړولي دي. هغه ویلي، چې د دغو پېښو تر ټولو ډېر اغېز په کابل، پروان، پنجشیر، بامیان، دایکندی، میدان وردک، غزني، هرات، غور، بادغیس، بلخ، فاریاب، سرپل، سمنګان او نورستان ولایتونو کې ثبت شوی دی.

 د طبیعي پېښو پر وړاندې د مبارزې اداره وایي، چې د زیانونو د کره ارزونې او د اغېزمنو شویو کورنیو د ثبت بهیر لا هم روان دی، او تمه ده چې د تلفاتو او زیانونو شمېر تر دې هم لوړ شي. د ادارې په وینا، د ژغورنې ډلې هڅه کوي چې تر ټولو زیانمنو سیمو ته لاسرسی پیدا کړي، خو د واورو ډېرښت، تړل شوې لارې او سړې هوا د مرستندویه هڅو پر وړاندې جدي خنډونه رامنځته کړي دي.

 د سیمو اوسېدونکي وایي، چې سختې واورې، د کورونو نړېدل، د سړکونو بندېدل او د سړې هوا دوام د خلکو ژوند له سختو ستونزو سره مخ کړی دی. یو شمېر کورنۍ د سرپناه له لاسه ورکولو وروسته اړ شوې، چې په موقتي ځایونو یا د خپلوانو په کورونو کې ژوند وکړي.

 بشري بنسټونه خبرداری ورکوي، چې که بېړنۍ مرستې پر وخت اغېزمنو کورنیو ته ونه رسېږي، نو د ماشومانو، ښځو او مشرانو ژوند به له لا جدي خطر سره مخ شي، په ځانګړي ډول په غرنیو او لرې پرتو سیمو کې چې ژمی سخت او امکانات محدود دي.

 د طالبانو د طبیعي پېښو پر وړاندې د مبارزې ادارې له ملي او نړیوالو مرستندویه بنسټونو غوښتي، چې له اغېزمنو شویو کورنیو سره بېړنۍ همکاري وکړي او د ژمي د روان بحران پر وړاندې د خلکو د ژغورنې لپاره عملي ګامونه پورته کړي.

د راپور په پای کې ویل شوي، چې افغانستان، چې له وړاندې د اقلیمي بدلون، فقر او کمزورو بنسټونو له امله زیانمن دی، هر کال د ژمي پر مهال له ورته طبیعي پېښو سره مخ کېږي، او د دوامدارو مخنیوي تدابیرو نشتون د خلکو زیانونه لا زیاتوي