کابل – په سویس کې د افغانستان سفیر، نصیراحمد اندیشه: د نجونو د زده‌کړو بندیز حکومتولي نه ده، بلکې د ناپوهۍ بنسټ اېښودل دي

بریانیوز:(سه شنبه،۷ دلو۱۴۰۴)  په سویس کې د افغانستان سفیر، نصیراحمد اندیشه، د طالبانو د لوړو زده‌کړو د وزیر وروستیو څرګندونو ته په سخت غبرګون کې ویلي چې د نجونو د زده‌کړو بندیز «حکومتولي نه ده، بلکې د ناپوهۍ نهادینه کول دي

اندیشه د سه‌شنبې په ورځ، د دلو ۷مه، پر خپله اېکس (پخوانی ټویټر) پاڼه لیکلي چې په داسې حال کې چې نړۍ د پوهنې نړیواله ورځ لمانځي او د زده‌کړو لاسته‌راوړنې نمانځي، د طالبانو د لوړو زده‌کړو وزیر یو ځل بیا ټینګار کړی چې نه یوازې په افغانستان کې د ښځو زده‌کړې منع دي، بلکې ان د دې پوښتنه کول چې «ولې؟» هم منع بلل کېږي

هغه زیاته کړې: «دا څرګندونې د افغانستان د خلکو، اسلامي ارزښتونو او د ملګرو ملتونو پر وړاندې ښکاره سپکاوی دی

«دا بندیز نه موقتي دی او نه دیني توجیه لري

د افغانستان سفیر په سویس کې ویلي چې طالبانو په ښکاره ډول ثابته کړې چې د نجونو او ښځو د زده‌کړو بندیز نه موقتي دی، نه دیني توجیه لري او نه هم د بحث وړ ګڼل کېږي. د هغه په وینا، دا تګلاره د ټولنې د کنټرول لپاره یوه سیاسي وسیله ده، نه د دین او نه هم د ملي ګټو غوښتنه

اندیشه ټینګار کړی چې د زده‌کړو مخنیوی د افغانستان راتلونکی له جدي ګواښ سره مخ کوي او هېواد د پرمختګ، عدالت او انساني کرامت له لارې شاته بیایي.

د مقاومت او هیله پیغام

نصیراحمد اندیشه په خپلو څرګندونو کې ویلي چې سره له ټولو فشارونو او بندیزونو، د افغانانو مقاومت به دوام ولري. هغه زیاته کړې: «موږ باور لرو چې د ازادۍ زده‌کړې او انساني کرامت لپاره زموږ مبارزه به بریالۍ شي

شالید

دا څرګندونې په داسې حال کې کېږي چې له څلورو کلونو ډېر وخت تېرېږي چې طالبان یو ځل بیا پر افغانستان واکمن شوي دي، خو په دې موده کې یې د نجونو پر مخ د منځنیو ښوونځیو او پوهنتونونو دروازې تړلې پاتې دي. دا بندیز د کورنیو او نړیوالو پراخو نیوکو سره سره لا هم پر ځای دی او د افغانستان بشري او تعلیمي راتلونکی یې له جدي ننګونو سره مخ کړی دی