کابل – د افغاني سرې میاشتې او د ترکیې استازي ترمنځ د روژې په میاشت کې د یتیمانو د ملاتړ په اړه خبرې

کابل –  د افغاني سرې میاشتې او د ترکیې استازي ترمنځ د روژې په میاشت کې د یتیمانو د ملاتړ په اړه خبرې

بریانیوز(چهارشنبه،۲۲ دلو۱۴۰۴) 

کابل – افغاني سره میاشت وایي چې د ترکیې د دیني چارو ادارې له استازي سره یې په یوه ناسته کې د روژې مبارکې میاشتې پر مهال د یتیمو ماشومانو او اړمنو کورنیو د ملاتړ پر لارو چارو خبرې کړې دي

د یاد بنسټ د خبرپاڼې له مخې، دا ناسته د افغاني سرې میاشتې د مرستیال حافظ عزیزالرحمن او په افغانستان کې د ترکیې د دیني چارو ادارې د استازي امراه کان دمیر په ګډون ترسره شوې ده

مهم ټکي:

◾️ دواړو لورو د روژې په میاشت کې د یتیمانو او بې‌وزلو کورنیو د ملاتړ پر پروګرامونو خبرې وکړې

◾️ د افطاري د پروګرامونو پلي کول په کابل او یو شمېر ولایتونو کې د بحث اساسي برخه وه

◾️ د ترکیې استازي ویلي، یو شمېر یتیمو ماشومانو ته ژمنۍ جامې وېشل شوې دي

◾️ د مرستو دوام او پراخوالی د دواړو خواوو د همکاریو له مهمو ټکو څخه بلل شوی

د افغاني سرې میاشتې په وینا، د روژې په میاشت کې د افطاري پروګرامونه او نغدي یا توکي مرستې کولای شي د هغو کورنیو لپاره مهمه مرسته وي چې له سخت اقتصادي وضعیت سره مخ دي

په ورته وخت کې، د ترکیې استازي ډاډ ورکړی چې بشري مرستې به دوام ولري او هڅه به وشي څو ډېرې اړمنې کورنۍ تر پوښښ لاندې راوستل شي

د یادونې وړ ده چې افغانستان له اقتصادي ستونزو او د بې‌وزلۍ له زیاتوالي سره مخ دی، او بشري مرستې د ګڼو کورنیو لپاره حیاتي ارزښت لري، په ځانګړي ډول د روژې په مبارکه میاشت کې