له ښوونځي تر مدرسې: د تعليمي تګلارې بدلون که مالي بحران؟

اشتراک گذاری:

د کندهار ولايت د بېلابېلو ولسواليو د سلګونه ښوونکو بستونه تنقيص شوي دي.

بریانیوز( پنجشنبه، ٢٣ دلو ١٤٠٤)

د پوهنې رياست يوې سرچينې ويلي، چې دغه ښوونکي د راتلونکي کال له تشکيل څخه ايستل شوي او په ترلاسه شوي لېست کې د شاوخوا ۴۰۰ تنقيص شويو ښوونکو نومونه ثبت دي.

که څه هم رسمي دليل د بودجې کسر ښودل شوی، خو د پوهنې يو شمېر څارونکي دا پرېکړه يوازې مالي موضوع نه بولي. د دوی په باور، په تېرو کلونو کې د رسمي ښوونيز سيستم پر کمزوري کولو او د مدرسو پر پياوړتيا ټينګار د دې څرګندونه کوي چې تعليمي تګلاره په بنيادي ډول بدلېږي.

د طالبانو ځينو مشرانو مخکې ويلي وو چې دوی د ښوونځي او مدرسې ترمنځ واټن ختم کړی دی. منتقدين وايي، که دا شعار په عملي ډګر کې د ښوونکو د بستونو په کمولو، د نصاب په بدلون او د ښوونځيو د محدودولو له لارې پلې کېږي، نو دا به په تدريجي ډول د رسمي ښوونيز نظام د کمزورۍ او د مدرسه‌محوره جوړښت د پياوړتيا لامل شي.

د پوهنې فعالان خبرداری ورکوي چې که دا لړۍ دوام ومومي، نو عصري ښوونيز بنسټونه به له جدي فشار سره مخ شي او د هېواد تعليمي راتلونکی به يو اړخيز او محدود چوکاټ ته واوړي.