واشنګټن – د امریکا کانګرس د ایران پر ضد د پوځي اقدام د مخنیوي طرحه رایو ته وړاندې کوي

واشنګټن –  د امریکا کانګرس د ایران پر ضد د پوځي اقدام د مخنیوي طرحه رایو ته وړاندې کوي 

بریانیوز(جمعه ، ۸ حوت ١٤٠٤)

واشنګټن – د امریکا متحدو ایالتونو او ایران ترمنځ د پوځي تاوتریخوالي له زیاتېدو وروسته، د امریکا د استازو مجلس او سنا یو شمېر غړو ژمنه کړې چې راتلونکې اوونۍ به داسې طرحه رایو ته وړاندې کړي چې له مخې به یې ولسمشر ډونالډ ټرمپ ونه شي کولای د کانګرس له رسمي اجازې پرته د ایران پر ضد پوځي اقدام ترسره کړي

د یادې طرحې پلویان وایي چې د جګړې او پوځي عملیاتو صلاحیت باید د ولس د استازو له لوري وکارول شي، ځکه چې د اساسي قانون له مخې د جګړې اعلانول د کانګرس واک دی، نه یوازې د ولسمشر. هغوی ټینګار کوي چې هر ډول پوځي پرېکړه باید د ملي ګټو، سیمه‌ییز ثبات او نړیوالو پایلو په پام کې نیولو سره او د قانوني بهیر له لارې ترسره شي

دغه نوښت په داسې حال کې مخې ته راغلی چې د واشنګټن او تهران ترمنځ لفظي ناندرۍ او سیاسي فشارونه زیات شوي او د احتمالي پوځي ټکر اندېښنې راپورته شوې دي. د کانګرس غړي وایي چې د بېړني او یو اړخیز پوځي اقدام مخنیوی به هېواد له اوږدمهالو او لګښتمنو شخړو څخه وساتي.

بل لور ته ولسمشر ډونالډ ټرمپ تر اوسه د دې طرحې په اړه څرګند دریځ نه دی اعلان کړی، خو پخوا یې ویلي وو چې که د امریکا ملي ګټې له ګواښ سره مخ شي، نو پرېکنده اقدام به وکړي

سیاسي شنونکي باور لري چې که دا طرحه تصویب شي، نو دا به د امریکا په کورني سیاست کې یو مهم بدلون وي او هم به د منځني ختیځ پر روان وضعیت ژور اغېز وکړي. تمه کېږي چې راتلونکې اوونۍ به په کانګرس کې پر دې موضوع تود بحثونه وشي او وروستۍ پرېکړه به د امریکا او ایران د اړیکو راتلونکی مسیر روښانه کړي