قالیباف د ټرمپ څرګندونې رد کړې؛ د هرمز تنګي په تړاو یې سخت خبرداری ورکړ

قالیباف د ټرمپ څرګندونې رد کړې؛ د هرمز تنګي په تړاو یې سخت خبرداری ورکړ

بریانیوز:(شنبه،۲۹ حمله ۱۴۰۵)

د محمد باقر قالیباف، د ایران د پارلمان رئیس، د ډانلډ ټرمپ وروستۍ څرګندونې په کلکه رد کړې او هغه یې «بې‌بنسټه او ناسمې ادعاوې» بللې دي، په داسې حال کې چې د تهران او واشنګټن ترمنځ سیاسي ترینګلتیا لا هم پر خپل ځای پاتې ده

قالیباف، چې په وروستیو خبرو اترو کې یې د ایران پلاوي مشري کوله، ټینګار کړی چې د امریکا د ولسمشر څرګندونې د حقیقت انعکاس نه کوي، بلکې د سیاسي فشار او تبلیغاتو یوه برخه ده. هغه زیاته کړه چې دا ډول څرګندونې نه یوازې د باور فضا زیانمنوي، بلکې د ډیپلوماټیکو هڅو پر وړاندې خنډونه هم رامنځته کوي

نوموړي د د هرمز تنګی په تړاو هم څرګند خبرداری ورکړ او ویې ویل چې که پر ایران فشارونه او احتمالي سمندري بندیزونه دوام ومومي، نو د دې ستراتیژیکې سمندري لارې وضعیت به بدلون ومومي

د هغه په وینا، د هرمز تنګي امنیت او پرانیستې تګ راتګ یوازې د متقابل درناوي او عملي شرایطو پورې تړلی دی

قالیباف همداراز ټینګار وکړ چې ایران به هېڅکله د خپلو ملي ګټو او حاکمیت پر وړاندې امتیاز ور نه کړي او هر ډول اقدام ته به په حساب شوي او متناسب ډول ځواب ووايي

شنونکي باور لري چې د دواړو هېوادونو ترمنځ دا توندې څرګندونې د سیاسي بې‌باورۍ نښه ده او که رغنده خبرې اترې پیاوړې نه شي، نو د سیمې پر امنیتي وضعیت به ژور اغېز وکړي

د هغوی په اند، د هرمز تنګي حساسیت ته په کتو، هر ډول کړکېچ کولای شي نړیوال اقتصادي او انرژۍ بازارونه هم له جدي ننګونو سره مخ کړي