مقاله

د هرمز تنګي په اړه د تهران سخت دریځ؛ د ایران له لوري د تېلو د لارې د امنیت په تړاو توند پیغام

اشتراک گذاری:

بریانیوز:( دوشنبه،۳۱ حمل۱۴۰۵)

د محمد رضا عارف، چې د ایران د ولسمشر لومړی مرستیال دی، په تازه څرګندونو کې ویلي چې د هرمز تنګی امنیت “وړیا نه دی” او د نړۍ د تېلو د بازار وضعیت د ایران پر وړاندې د روانو اقتصادي او پوځي فشارونو سره مستقیم تړاو لري

عارف پر خپله اېکس پاڼه لیکلي، دا وضعیت د منلو وړ نه دی چې پر ایران د تېلو د صادراتو بندیزونه ولګول شي، خو په مقابل کې دې د هرمز تنګی د نورو هېوادونو لپاره د ازادې سوداګرۍ خوندي لاره پاتې وي. د هغه په وینا، دا ډول تګلاره عادلانه نه ده او د نړیوالو اقتصادي اړیکو توازن ګډوډوي

هغه زیاته کړې: «انتخاب روښانه دی: یا به د تېلو بازار د ټولو لپاره ازاد وي، او یا به ټول اړخونه درانه اقتصادي لګښتونه پرې کوي.» د دې څرګندونو له مخې، تهران هڅه کوي د نړیوالو فشارونو په وړاندې خپل دریځ لا روښانه کړي

تر دې وړاندې د خاتم‌الانبیا مرکزي قوماندانۍ هم د متحده ایالات له لوري د یوې ایرانی کښتۍ د نیولو په غبرګون کې خبرداری ورکړی و، چې د اړتیا په صورت کې به د هرمز تنګی په بشپړ ډول وتړل شي

شنونکي وایي، د هرمز تنګی هر ډول کړکېچ نه یوازې د سیمې پر امنیت اغېز کوي، بلکې د نړیوالې انرژۍ بازار ته هم جدي خطر پېښوي، ځکه چې دا لاره د نړۍ د تېلو د لېږد له مهمو شریانونو څخه ګڼل کېږي