د طالبانو نوي پریکړه: که د جومات ملا اجازه ورکړي، کور جوړولای شی

طالبانو کابینې په کابل او نورو لویو ښارونو کې د کورونو د جوړولو لپاره نوې کړنلاره تصویب کړې ده.

بریانیوز( چهارشنبه، ٢ ثور ١٤٠٥)

د دې نوي حکم له مخې، ښاریان باید د کور جوړولو لپاره د «شرعي قبالې، ورکړل شوي مالیې ټکټ، د معاملاتو د دفتر اسنادو» تر څنګ د کوڅې د وکیل تصدیق او د جومات د ملا تصدیق هم ولري.

په هغه مکتوب کې چې د دوشنبې په ورځ، د حمل په ۳۱مه، د طالبانو د ریاست الوزرا اداري مرستیالۍ له خوا خپور شوی، د سرپناه پر جوړولو په ځانګړي ډول د هغو راستنو شویو مهاجرینو د ستونزو د حل لپاره ټینګار شوی دی. همدارنګه پکې ویل شوي چې د جوړولو بهیر باید د ښاروالیو په همغږۍ ترسره شي.

په دې لارښوونه کې د طالبانو ځواکونو ته هم ټینګار شوی چې د جوړولو په چارو کې لاسوهنه ونه کړي.

 د دې مکتوب له مخې، کورونه باید یوازې د استوګنې لپاره وي او تر درې منزلو پورې، پرته له زیرزمین (لاندې پوړ) جوړ شي.

په مکتوب کې دا هم راغلي چې ښاروالۍ او د ځمکو ادارې مکلفې دي چې د یوې میاشتې په موده کې ممنوعه سیمې مشخصې کړي.

د کابل نوی ښار (شهرک کابل جدید) له دې حکم څخه مستثنی اعلان شوی دی.

دا اقدام په داسې حال کې کېږي چې د ګاونډیو هېوادونو څخه د میلیونونو مهاجرینو له راستنېدو وروسته، د افغانستان لوی ښارونه، په ځانګړي ډول کابل، د کورونو له سخت کمښت سره مخ دي او د کرایې بیې په څرګند ډول لوړې شوې دي.

تر دې مخکې هم داسې راپورونه خپاره شوي وو چې ښيي د طالبانو له خوا په ساختماني مقرراتو کې پرله‌پسې بدلونونو د جوړولو بهیر ورو کړی او زرګونه کارګران بې‌کاره کړي او د کورونو بازار له بحران سره مخ کړی.