ایران له خبرو اترو د وتلو اعلان وکړ؛ د امریکا د لوړپوړي سفر لغوه کېدل د کړکېچ نښې نورې هم څرګندوي

ایران له خبرو اترو د وتلو اعلان وکړ؛ د امریکا د لوړپوړي سفر لغوه کېدل د کړکېچ نښې نورې هم څرګندوي

بریانیوز:(چهار شنبه،۲/ثور/۱۴۰۵هـــ .ش)

د ایران د انقلابي ګارډ ځواکونو پورې تړلې سرچینې ویلي چې تهران پرېکړه کړې له روانو خبرو اترو څخه ووځي او په اوسني وضعیت کې پکې ګډون ونه کړي. د دغې سرچینې په وینا، د ایران د خبرو اترو ټیم باور لري چې د اوسني شرایطو په رڼا کې د خبرو دوام هېڅ عملي پایله نه لري او یوازې د وخت ضایع کېدل دي

ویل شوي چې دا پرېکړه د وروستیو سیمه‌ییزو ترینګلتیاوو، د سیاسي اختلافاتو د زیاتېدو او د اړخونو ترمنځ د بې باورۍ د ژورېدو له امله شوې ده. د ایران له نظره، تر هغو چې بنسټیز شرایط بدل نه شي، د خبرو اترو له لارې پرمختګ ناممکن ښکاري

له بلې خوا، د اسوشېټېډ پرېس خبري اژانس د یوه امریکایي چارواکي په حواله راپور ورکړی چې د امریکا مرستیال ولسمشر جې ډي ونس پاکستان ته خپل پلان شوی سفر لغوه کړی دی

د سفر د لغوه کېدو رسمي لامل نه دی څرګند شوی، خو دا ګام په داسې وخت کې اخیستل شوی چې سیمه د سیاسي او ډیپلوماټیکو بدلونونو له مهم پړاو سره مخ ده

راپورونه زیاتوي چې د خبرو اترو درېدنه او د لوړپوړو سفرونو لغوه کېدل د سیمې د روان وضعیت د لا پیچلتیا څرګند نښه ده او د اړیکو په فضا کې د زیاتېدونکي فشار انعکاس ګڼل کېږي

شنونکي وايي چې دا ډول پرمختګونه ښيي د ډیپلوماټیکو هڅو لاره له خنډونو ډکه ده او د باور جوړونې بهیر کمزوری شوی دی. د هغوی په باور، که ژر نوې هڅې ونه شي، نو د کړکېچ د پراخېدو خطر لا هم پر ځای پاتې دی