د هرمز تنګي کړکېچ لا پسې تاو شو: د ایران بېړۍ نیول او د امریکا محاصره د تاوتریخوالي اور بلوي

د هرمز تنګي کړکېچ لا پسې تاو شو: د ایران بېړۍ نیول او د امریکا محاصره د تاوتریخوالي اور بلوي

بریانیوز:(پنجشنبه،۳ ثور۱۴۰۵)

په یوه مهم او اندېښمنوونکي پرمختګ کې، ایران د چهارشنبې په ورځ د تنگه هرمز په ستراتیژیکه اوبو لاره کې دوه بېړۍ توقیف کړې دي، هغه ګام چې د سیمې د امنیتي وضعیت د لا ترینګلتیا نښه بلل کېږي

راپورونه ښيي چې دا اقدام وروسته له هغې ترسره شو چې د سولې د خبرو د بیا پیل کومه روښانه نښه ونه لیدل شوه، او تهران پرېکړه وکړه چې پر دې حیاتي سمندري لارې خپل کنټرول نور هم پراخ کړي

بل لور ته، د دانلد ترمپ په مشرۍ د متحده ایالات امریکا حکومت د ایران پر وړاندې خپله سمندري محاصره پر ځای ساتلې ده. ویل کېږي چې د امریکا سمندري ځواکونه د ایران د سوداګرۍ پر بهیر محدودیتونه لګولي او په سیمه کې خپل حضور ته دوام ورکوي

د رویترز د راپور له مخې، د ایران د پارلمان رئیس او لوړپوړی مذاکره کوونکی محمدباقر قالیباف ټینګار کړی چې بشپړ اوربند هغه مهال مانا پیدا کوي چې د ایران پر وړاندې لګېدلې سمندري محاصره پای ته ورسېږي

قالیباف په خپل پیغام کې، چې د ټولنیزې شبکې ایکس له لارې خپور شوی، ویلي چې د اوربند «ښکاره نقض» د دې لامل ګرځي چې د هرمز تنګي بیا پرانیستل ناممکن شي. هغه خبرداری ورکړی چې روان فشارونه به نه یوازې د سیمې ثبات، بلکې د نړیوال اقتصاد پر بهیر هم منفي اغېز وکړي

شنونکي باور لري چې د هرمز تنګي په څېر مهمه اوبو لاره کې هر ډول تاوتریخوالی کولای شي د انرژۍ نړیوال بازارونه ګډوډ کړي، ځکه دا تنګی د نړۍ د تېلو د لېږد یو له مهمو لارو څخه شمېرل کېږي