روسیې افغانستان ته د غني شويو غنمو اوړو لومړنۍ جوپه وسپارله

اشتراک گذاری:

(بریانیوز:(جـمـعـه،۴/ثور/۱۴۰۵هـــ .ش

د د روسیې د بهرنیو چارو وزارت اعلان کړی، چې دغه هېواد د غني شويو غنمو اوړو خپله لومړنۍ جوپه د پنجشنبې په ورځ په مزار شریف کې د ځانګړو مراسمو پر مهال د د خوړو نړیوال پروګرام ته وسپارله

د چارواکو په وینا، دا مرسته د افغانستان د هغو کورنیو د ملاتړ لپاره ده چې له سختو اقتصادي او بشري ستونزو سره مخ دي. ویل شوي، چې دغه غني شوي اوړه د غذایي ارزښت له پلوه بډایه دي او کولی شي د خلکو د خوړو د کمښت او خوارځواکۍ د کچې په راکمولو کې مهم رول ولوبوي

د روسیې د بهرنیو چارو وزارت ټینګار کړی، چې دا اقدام د بشري مرستو د دوامداره لړۍ یوه برخه ده او مسکو به هڅه وکړي چې د افغانستان له خلکو سره خپلې مرستې نورې هم پراخې کړي

بلخوا، د خوړو نړیوال پروګرام ویلي، چې په افغانستان کې د بشري اړتیاوو کچه لا هم لوړه ده او میلیونونه کسان د خوړو له کمښت سره مخ دي

د دې ادارې په وینا، نړیواله همکاري د دې بحران د مهار لپاره حیاتي ارزښت لري

کارپوهان باور لري، چې دا ډول مرستې کولی شي د لنډ مهال لپاره د خلکو ستونزې راکمې کړي، خو د اوږدمهاله حل لپاره اړتیا ده چې اقتصادي ثبات، کارموندنه او دوامدار پرمختګ ته جدي پاملرنه وشي