ورزش

فیفا د افغان ښځینه مهاجرې فوټبال لوبډلې ته نړیوالو سیالیو اجازه ورکړه

اشتراک گذاری:

بریانیوز:(پنجشنبه، ۱۰ ثور ۱۴۰۵)

د ښځینه افغان مهاجرینو د فوټبال لوبډله چې د «افغان ښځې یو موټی» په نوم پېژندل کېږي، د نړیوال فوټبال د فدراسیون له خوا د یوې تاریخي پرېکړې وروسته د رسمي نړیوالو سیالیو د ګډون وړ وګرځول شوه

د یاد فدراسیون له خوا په خپره شوې پرېکړه کې ویل شوي چې دغه لوبډله به له دې وروسته وکولای شي په نړیوالو رسمي سیالیو کې د ګډون لپاره راجستر شي او د نورو هېوادونو له لوبډلو سره سیالي وکړي

دا پرېکړه د افغان ښځینه لوبغاړو لپاره یو مهم پرمختګ بلل کېږي، ځکه هغوی په وروستیو کلونو کې د هېواد د سیاسي بدلونونو وروسته له سختو شرایطو سره مخ شوي او ډېری یې له هېواده بهر د مهاجرت ژوند کوي

د لوبډلې غړو ویلي چې دا فرصت ورته د بیا هیله، هڅونې او د سپورتي فعالیتونو د دوام زمینه برابروي، او دوی غواړي د افغان ښځو استازیتوب په نړیوالو ډګرونو کې وکړي

کارپوهان وایي، دا ډول پرېکړې کولای شي د ښځینه ورزشکارانو لپاره نوي فرصتونه رامنځته کړي او د افغان ښځو د سپورتي ونډې نړیواله پېژندنه زیاته کړي