سفر

د افغانانو لپاره لوی اسانتیا: جرمني د ویزو نوې انلاین دروازه پرانیزي

اشتراک گذاری:

بریانیوز(شنبه، ۱۲ ثور ۱۴۰۵)

د جرمني سفارت په پاکستان کې اعلان کړی چې د افغان اتباعو لپاره یې د کاري او تحصیلي ویزو غوښتنې لپاره یو نوی، عصري او انلاین سیسټم پیل کړی دی، چې له مخې به یې د ویزو بهیر لا چټک، اسانه او منظم شي

د سفارت په خبرپاڼه کې راغلي چې له دې وروسته به افغان غوښتونکي اړ نه وي چې د لومړنیو مرحلو د بشپړولو لپاره پاکستان ته سفر وکړي. غوښتونکي کولای شي په انلاین ډول خپل اسناد وسپاري، د هغو بشپړتیا تایید کړي، او یوازې هغه وخت پاکستان ته ولاړ شي کله چې د مرکې نېټه ورته وټاکل شي

دا نوښت د هغو زرګونو افغانانو لپاره مهم بدلون بلل کېږي چې تر دې وړاندې به یې د ویزې بهیر د پیل لپاره له ګڼو ستونزو، لګښتونو او اوږدو انتظارونو سره مخ کېدل. اوس به هغوی وکولای شي په اسانه او خوندي ډول له خپل ځایه د غوښتنې لومړني پړاوونه بشپړ کړي

د خبرپاڼې له مخې، دغه نوی سیستم به د روان زېږیز کال د جون میاشتې له لومړۍ نېټې څخه عملي شي، او تمه ده چې د غوښتونکو لپاره به د انتظار موده کمه او د خدماتو کیفیت لوړ کړي

کارپوهان وايي، دا ګام به د افغان ځوانانو لپاره د لوړو زده کړو او کاري فرصتونو نوې دروازې پرانیزي، او د قانوني مهاجرت بهیر ته به هم شفافیت او اسانتیاوې ور زیاتې کړي